عراق: شدت پسندوں کے خلاف سکیورٹی فورسز کی بڑی کارروائیاں

خبر رساں اے ایف پی کے مطابق ایک ایسے موقع پر کہ جب اقوام متحدہ نے داخلی طور پر نقل مکانی کرنے والے ہزاروں عراقی باشندوں کے تحفظ کے لیے بڑے امدادی آپریشن کی تیاریوں کا اعلان کیا ہے، عراقی فورسز نے بھی شدت پسندوں کے خلاف کارروائیوں میں تیزی پیدا کردی ہے۔

نیوز ایجنسی اے ایف پی کے مطابق امریکی فضائی کارروائیوں اور مغربی ہتھیار ملنے کے بعد عراقی کی وفاقی اور کُرد فورسز کی کارروائیوں میں نمایاں تیزی دیکھی گئی ہے۔ ابھی حال ہی میں کرد فورسز نے عراق کے سب سے بڑے ڈیم پر قابض شدت پسندوں کو مار بھگایا تھا اور اس ڈیم کا کنٹرول دوبارہ حاصل کر لیا تھا۔

بغداد حکومت کے مطابق وفاقی فورسز ملیشیا اور قبائلی جنگجوؤں کے ہمراہ ملک کے شمال، مغرب اور جنوب میں اسلامک اسٹیٹ کے شدت پسندوں کے خلاف بڑی کارروائیاں کر رہی ہیں۔

شدت پسندوں کے خلاف یہ جوابی حملے ایک ایسے وقت میں شروع کیے گئے ہیں جب اقوام متحدہ کے ادارہ برائے مہاجرین نے رواں ہفتے ’پانچ لاکھ‘ کے قریب بے گھر افراد کی مدد کے لیے ایک بڑے آپریشن کا اعلان کیا ہے۔

امریکی صدر باراک اوباما نے موصل ڈیم پر فورسز کے قبضے کو خوش آئند قرار دیا، تاہم بغداد حکومت کو خبردار کیا کہ ’بھیڑیا گھر کے دروازے‘ پر ہے۔ انہوں نے کہا کہ عراق میں تمام فرقوں اور اقلیتوں کی حامل ایک حکومت کے قیام کی ضرورت ہے۔

واضح رہے کہ رواں برس جون میں اسلامک اسٹیٹ کے عسکریت پسندوں نے سکیورٹی فورسز کو مکمل طور پر شکست دیتے ہوئے عراق کے ایک بڑے علاقے پر قبضہ کر لیا تھا اور ان کی پیش قدمی مسلسل جاری تھی، تاہم یہ پہلا موقع ہے کہ ان کے زیر قبضہ کسی علاقے کا کنٹرول دوبارہ حاصل کیا گیا ہے۔ صدر اوباما نے موصل ڈیم پر دوبارہ کنٹرول حاصل کرنے پر عراقی اور کرد فورسز کی تعریف کرتے ہوئے کہا، ’’اس آپریشن سے واضح رہے کہ عراقی اور کرد فورسز مل کر کام کرنے کی صلاحیت رکھتی ہیں۔‘‘

ان کا مزید کہنا تھا، ’’اگر وہ یوں ہی اپنی مشترکہ کارروائیاں جاری رکھتے ہیں، تو انہیں امریکا کی مکمل حمایت حاصل رہے گی۔‘‘