شامی مہاجرین کے لیے امریکا کی جانب سے مزید امداد کا اعلان

خبر رساں ادارے ایسوسی ایٹڈ پریس کے مطابق جوبائیڈن کی ایردوآن سے ملاقات میں دونوں ممالک کے درمیان اسلامک اسٹیٹ کے خلاف ترکی کے زیادہ کردار پر تو کوئی پیش رفت نہ ہو سکی تاہم امریکا کی جانب خانہ جنگی کے شکار شامی باشندوں کے لیے مزید امداد کا اعلان سامنے آیا ہے۔ امریکی نائب صدر کے دورہء ترکی کا ایک مقصد یہ تھا کہ اسلامک اسٹیٹ کے خلاف جاری بین الاقوامی اتحادی کارروائیوں میں ترکی کو سرگرم کردار ادا کرنے پر آمادہ کیا جائے، تاہم فریقین کے درمیان اس موضوع پر اختلافات برقرار ہیں۔

 دونوں رہنماؤں نے اس ملاقات میں طے  پانے والے اتفاق رائے کے حوالے سے کوئی تفصیلات نہیں بتائی ہیں کہ شام اور عراق میں سرگرم دہشت گرد تنظیم اسلامک اسٹیٹ کے خلاف امریکی قیادت میں جاری بین الاقوامی عسکری کارروائیوں میں ترکی کس طرح اور کتنی مدد کر سکتا ہے۔

خبر رساں ادارے ایسوسی ایٹڈ پریس کے مطابق شام میں صورت حال کی بہتری کے لیے دونوں رہنماؤں کے نکتہ ہائے نظر میں واضح فرق موجود ہے۔ ترکی چاہتا ہے کہ شام میں نو فلائی زون قائم کر کے بین الاقوامی کوششوں کو بشار الاسد کے اقتدار کے خاتمے پر مرکوز کیا جائے، تاہم امریکا کی توجہ شام اور عراق میں فعال شدت پسند تنظیم اسلامک اسٹیٹ پر مرکوز ہے۔ ترکی شمالی شام میں اعتدال پسند باغیوں کو تحفظ فراہم کرنے کے لیے نوفلائی زون یا سیف زون کا مطالبہ کرتا آیا ہے، لیکن امریکا اب تک اس مطالبے کو صرفِ نظر کیے ہوئے ہے۔

ملاقات کے بعد دونوں رہنماؤں نے صحافیوں سے بات چیت میں باہمی اختلافات کے بجائے گفتگو کا مرکز دونوں ممالک کے درمیان چھ دہائیوں پر مبنی تعلقات کر رکھا۔

ایسوسی ایٹڈ پریس کے مطابق امریکا اسلامک اسٹیٹ کے خلاف کارروائیوں کے لیے ترکی کا اَنچرلیک فوجی اڈا حاصل کرنا چاہتا ہے، تاہم اس ملاقات میں اس بابت کوئی پیش رفت ہوئی یا نہیں، دونوں رہنماؤں نے اس بابت کوئی بات نہ کی۔

بائیڈن نے صحافیوں سے بات چیت میں کہا ہے کہ ترکی شام کی اعتدال پسند اپوزیشن کے جنگجوؤں کو تربیت فراہم کرنے پر آمادہ ہے، لیکن اس سلسلے میں بھی تفصیلات ظاہر نہیں کی گئیں۔