شام میں فضائی حملوں کے باوجود اسلامک اسٹیٹ کی کامیاب پیشقدمی

خبر رساں ادارے اے ایف پی نے بتایا ہے کہ امریکی اتحادی فورسز کے فضائی حملوں کے باوجود شام میں فعال اسلامک اسٹیٹ کے جنگجو پیشقدمی کرتے ہوئے ترک سرحد کے قریب واقع حکمت عملی کے اعتبار سے اہم کرد شہر عین العرب کے قریب پہنچ چکے ہیں۔ سیریئن آبزرویٹری کے مطابق یہ شدت پسند عین العرب (کوبانی) سے صرف پانچ کلو میٹر کی دوری پر موجود ہیں۔ ان شدت پسندوں نے دو ہفتے قبل اس علاقے کی طرف پیشقدمی شروع کی تھی۔

آبزرویٹری کے سربراہ رامی عبدالرحمان نے پیر کے دن بتایا ہے کہ پیر کے دن ان جہادیوں نے عین العرب پر پندرہ راکٹ بھی فائر کیے، جن کے نتیجے میں کم ازکم ایک شخص ہلاک ہو گیا۔ بتایا گیا ہے کہ کچھ راکٹ سرحدی علاقے میں بھی گرے۔ اس صورتحال میں ترکی نے شام سے متصل اپنی سرحدوں پر ٹینک تعینات کر دیے ہیں تاکہ ان شدت پسندوں کو ترکی میں داخل ہونے سے روکا جا سکے۔ نیٹو کے رکن ملک ترکی کی حکومت نے یہ بھی کہا ہے کہ رواں ہفتے پارلیمنٹ میں اس بات پر بحث کی جائے گی کہ آیا ان جہادیوں کے خلاف شروع ہونے والے امریکی اور اس کے عرب اتحادیوں کی مہم میں شریک ہوا جائے یا نہیں۔

اے ایف پی کے مطابق امریکا اور اس کی عرب اتحادی فورسز نے پیر کے دن بھی شام اور عراق میں شدت پسندوں کے متعدد ٹھکانوں کو نشانہ بنایا۔ اس آپریشن کی مرکزی کمانڈ کی طرف سے بتایا گیا ہے کہ شام میں آٹھ جبکہ عراق میں تین نئے اہداف پر حملے کیے گئے۔ شامی صوبے دیرالزور میں کیے گئے ایک حملے میں اسلامک اسٹیٹ کی متعدد مسلح گاڑیوں اور ایک اینٹی ایئر کرافٹ فوجی گاڑی کو تباہ کر دیا گیا۔ اس کے علاوہ الرقہ میں بھی جنگجوؤں کے ٹھکانوں کو نشانہ بنایا گیا ہے۔ یاد رہے کہ امریکا اور اس کے اتحادیوں نے آٹھ اگست کو عراق میں جبکہ تئیس ستمبر کو شام میں بھی فوجی کارروائی کا آغاز کر دیا تھا۔

دوسری طرف شامی وزیر خارجہ ولید المعلم نے پیر کے دن نیو یارک میں صحافیوں سے گفتگو کرتے ہوئے امریکا اور اس کے عرب اتحادیوں پر زور دیا کہ وہ شام میں اپنے حملوں میں وسعت پیدا کرتے ہوئے اسلامک اسٹیٹ کے علاوہ دیگر جنگجو گروہوں کو بھی نشانہ بنائیں۔ انہوں نے کہا کہ یہ تمام شدت پسند ایک ہی نظریے کے پیروکار ہیں۔ ان کا کہنا کہ تھا کہ ان انتہا پسند عناصر کے خلاف شامی حکومت بھی کارروائی جاری رکھے ہوئے ہے اور یہ امریکا اور اس کے عرب اتحادیوں کے علاوہ دمشق حکومت کے بھی دشمن ہیں۔

قبل ازیں ولید المعلم نے اقوام متحدہ کی جنرل اسمبلی میں خطاب کرتے ہوئے امریکا پر’دوغلی پالیسی‘ کا الزام عائد کرتے ہوئے کہا کہ وہ ایک طرف تو شام میں کچھ شدت پسندوں کو نشانہ بنا رہا ہے جبکہ دوسری طرف دیگر کو رقوم، اسلحہ اور تربیت فراہم کر رہا ہے۔ ان کا یہ بھی کہنا تھا کہ اس پالیسی سے تشدد اور دہشت گردی میں مزید اضافہ ہو گا۔