شام میں اتحادی فضائی حملے: ساڑھے پانچ سو سے زائد ہلاکتیں

یہ بات جمعرات 23 اکتوبر کے روز برطانیہ میں قائم اور انسانی حقوق کی صورت حال پر نظر رکھنے والی شامی اپوزیشن تنظیم سیریئن آبزرویٹری فار ہیومن رائٹس کی طرف سے بتائی گئی۔ خانہ جنگی کے شکار شام میں خونریز واقعات کا ریکارڈ رکھنے والی اس تنظیم کے حوالے سے لبنانی دارالحکومت بیروت سے موصولہ رپورٹوں میں بتایا گیا ہے کہ امریکا کی سربراہی میں بین الاقوامی عسکری اتحاد کے جنگی طیاروں نے شام میں اسلامک اسٹیٹ کے ٹھکانوں پر حملوں میں اب تک جو 521 عسکریت پسند ہلاک کیے ہیں، ان میں سے بہت بڑی اکثریت کا تعلق اسلامک اسٹیٹ ہی سے تھا، جو دولت اسلامیہ یا عربی زبان میں مختصراﹰ داعش بھی کہلاتی ہے۔

آبزرویٹری کے مطابق شام میں فضائی حملوں میں مارے جانے والے ان قریب سوا پانچ سو عسکریت پسندوں میں سے 464 دولت اسلامیہ کے جنگجو تھے۔ اسلامک اسٹیٹ یا دولت اسلامیہ ماضی میں دہشت گرد نیٹ ورک القاعدہ ہی کا ایک حصہ تھی مگر پھر اس گروپ نے، جسے اقوام متحدہ کی طرف سے دہشت گرد قرار دیا جا چکا ہے، اپنے راستے القاعدہ سے الگ کر لیے تھے۔

یہ تنظیم اب تک شام اور اس کے ہمسایہ ملک عراق میں وسیع تر علاقوں پر قبضہ کر چکی ہے اور اس نے اپنے زیر کنٹرول علاقوں میں خلافت کا اعلان بھی کر رکھا ہے۔ سیریئن آبزرویٹری کے مطابق شام میں ان فضائی حملوں میں اب تک القاعدہ کی شامی شاخ کہلانے والے عسکریت پسند گروپ النصرہ فرنٹ کے 57 شدت پسند بھی مارے جا چکے ہیں۔

شام میں داعش کی پیش قدمی کو روکنے کے لیے کیے جانے والے ان فضائی حملوں میں اب تک جو 32 عام شہری بھی ہلاک ہو چکے ہیں، سیریئن آبزرویٹری برائے انسانی حقوق کے مطابق ان میں چھ بچے اور پانچ خواتین بھی شامل ہیں۔

امریکی جنگی طیاروں کی طرف سے عراق میں اسلامک اسٹیٹ کے ٹھکانوں پر حملے اس سال جولائی سے کیے جا رہے ہیں۔ ستمبر کے مہینے میں واشنگٹن نے اپنے بہت سے اتحادی ملکوں کے ساتھ مل کر شام میں بھی اسلامک اسٹیٹ کے خلاف مسلح کارروائیاں شروع کر دی تھیں۔ شام میں ان حملوں کے لیے امریکا کو بہت سے عرب اور مغربی ممالک کی حمایت بھی حاصل ہے جبکہ عراق میں اب تک امریکی فضائیہ کے علاوہ فرانسیسی اور برطانوی جنگی طیارے بھی آئی ایس کے ٹھکانوں پر حملے کر چکے ہیں۔

واشنگٹن کی طرف سے شام میں ان فضائی حملوں کا اقوام متحدہ کے منشور کی شق نمبر 51 کے تحت دفاع کیا جاتا ہے۔ یہ شق کسی مسلح حملے کی صورت میں رکن ملکوں کی طرف سے اپنے ذاتی دفاع کے لیے انفرادی یا اجتماعی کارروائی کے حق کا احاطہ کرتی ہے۔

اقوام متحدہ کے اعداد و شمار کے مطابق شام کی تین سال پرانی خانہ جنگی میں اب تک قریب دو لاکھ انسان مارے جا چکے ہیں۔ سیریئن آبزرویٹری کے مطابق شام میں اب تک اتحادی جنگی طیاروں کی طرف سے اسلامک اسٹیٹ کے جنگجوؤں کے خلاف حلب، دیر الزور، ادلب اور الرقہ کے صوبوں میں حملے کیے گئے ہیں۔