سکیورٹی تحفظات، روسی حکام نے آئی پیڈ کا استعمال ترک کر دیا

خبر رساں ادارے اے ایف پی کے مطابق صحافیوں کی طرف سے نوٹ کیا گیا تھا کہ کابینہ کی ایک میٹنگ کے دوران روسی وزراء ایپل کمپنی کے تیار کردہ آئی پیڈز کی جگہ سام سنگ کمپنی کے ٹیبلٹ استعمال کر رہے تھے۔ جس پر روسی ٹیلی کام منسٹر نکولائی نِکی فوروف نے اس بات کی تصدیق کی کہ سام سنگ کے ٹیبلٹ کمپیوٹرز استعمال کرنے کا مقصد سخت سکیورٹی کو یقینی بنانا ہے۔ نِکی فوروف کے مطابق اس تبدیلی کو زیادہ وقت نہیں گزرا۔

روسی وزیر مواصلات کے مطابق سام سنگ ٹیبلٹ کمپیوٹرز ’خاص طور پر محفوظ بنائی گئی ڈیوائسز ہیں جن پر خفیہ معلومات کے حوالے سے کام کرتے ہوئے مکمل بھروسہ کیا جا سکتا ہے۔ نکولائی نکی فوروف کے مطابق، ’’حکومتی میٹنگز کے دوران بعض معلومات اپنی نوعیت کے لحاظ سے خفیہ ہوتی ہیں اور اس حوالے سے نئے ٹیبلٹ کمپیوٹر درکار معیارات پر پورا اترتے ہیں اور انہیں اس مقصد کے لیے سرٹیفیکیش کے سخت نظام سے گزارا گیا ہے۔‘‘

نِکی فوروف نے اس بات کی تردید کی کہ کریمیا کا کنٹرول سنبھالنے کے نتیجے میں روس مغربی طاقتوں کی طرف سے لگائی جانے والی پابندیوں کے ردعمل میں امریکی ٹیکنالوجی کو چھوڑ رہا ہے۔ ان کا کہنا تھا، ’’ہم پابندیوں کا مشورہ نہیں دے رہے۔‘‘

تاہم انہوں نے ایسی رپورٹس کا حوالہ ضرور دیا جن کے مطابق ’’امریکی خفیہ ادارے ۔۔۔ انٹرنیٹ کے ذریعے منتقل ہونے والے ڈیٹا کا کھوج لگانے کا عمل بڑھا دیں گے جو بہت سی حکومتوں کے لیے سنجیدہ نوعیت کے تحفظات پیدا کر سکتا ہے۔‘‘

نکی فوروف کے مطابق اس باعث روسی ریاست کے اہلکاروں کے لیے یہ ضروری ہو گیا ہے کہ وہ انفارمیشن ٹیکنالوجی کے حوالے سے اپنے پارٹنرز کے انتخابات میں بہت محتاط رہیں۔ ان کا مزید کہنا تھا کہ جنوبی کوریا کی کمپنیاں اور چینی کمپنیاں روس کے لیے اس حوالے سے زیادہ دلچسپی کا باعث ہو سکتی ہیں۔

روس کے سابق صدر اور موجودہ وزیراعظم دیمتری میدویدیف نے 2010ء میں سلیکان ویلی کا دورہ کیا تھا جہاں انہیں آنجہانی اسٹیو جابز نے ایک آئی فون بطور تحفہ پیش کیا تھا۔ میدویدیف نے اسی آئی فون کے ذریعے اپنا پہلا ٹوئیٹر پیغام جاری کیا تھا۔