سعودی عرب: شیعہ مسجد پر خودکش حملہ، متعدد ہلاکتیں

خبر رساں ادارے روئٹرز نے ایک عینی شاہد کے حوالے سے بتایا ہے کہ صوبہ قطیف کے القدیح نامی علاقے کی امام علی مسجد میں نماز جمعہ کے وقت ہونے والے اس حملے میں کم از کم تیس افراد ہلاک یا زخمی ہوئے ہیں۔ نیوز ایجنسی اے ایف پی نے مقامی افراد اور ہسپتال ذرائع کے حوالے سے ہلاکتوں کی تعداد تقریباﹰ بیس بتائی ہے۔ دریں اثناء سعودی وزارتِ داخلہ نے اس حملے کی تصدیق کر دی ہے۔ مشرقی سعودی عرب کی ایک نیوز ویب سائٹ نے اس دھماکے کی تصاویر اپ لوڈ کی ہیں، جن میں خون سے لت پت متعدد لاشیں دیکھی جا سکتی ہیں۔

قطیف کے سرکاری ہسپتال نے خون عطیہ کرنے کی اپیل کی ہے جبکہ چھٹی پر گئے ہوئے اسٹاف کو ہنگامی بنیادوں پر واپس طلب کر لیا گیا ہے۔ خدشہ ظاہر کیا جا رہا ہے کہ ہلاکتوں کی تعداد میں اضافہ ہو سکتا ہے۔ سعودی وزارت داخلہ کے مطابق فوری طور پر تحقیقات کا آغاز کر دیا گیا ہے اور جلد ہی اس دھماکے سے متعلق مزید معلومات فراہم کی جائیں گی۔

حال ہی میں سعودی حکومت نے متعدد ایسے عسکری گروپوں کے اراکین کو گرفتار کیا تھا جو مبینہ طور پر اس مشرقی صوبے میں فرقہ وارانہ کارروائیاں کرنا چاہتے تھے۔ یاد رہے کہ سعودی عرب کے شیعہ عقیدے کے زیادہ تر افراد قطیف میں آباد ہیں۔ مشرقی صوبے میں آباد ان شیعوں کا کہنا ہے کہ سعودی حکام اُن کے ساتھ مسلسل امتیازی سلوک کر رہے ہیں، جس سے نہ صرف اُن کا روزگار اور تعلیم متاثر ہو رہی ہے بلکہ وہ کھل کر مذہبی فرائض بھی انجام نہیں دے سکتے۔ سعودی حکومت ان الزامات کو رَد کرتی ہے۔

گزشتہ برس نومبر میں عاشورہ کے موقع پر مشرقی علاقے الدالوا میں مسلح افراد نے فائرنگ کرتے ہوئے کم از کم سات شیعہ افراد کو ہلاک کر دیا تھا، جن میں بچے بھی شامل تھے۔ ماضی میں شیعہ آبادی والے الاحسا اور قطیف ہی وہ دو صوبے تھے، جہاں سعودی حکومت کے خلاف احتجاجی ریلیاں نکلتی رہی ہیں۔ سعودی عرب کی دس سے پندرہ فیصد آبادی شیعہ مسلک سے تعلق رکھتی ہے۔