ساس کی قبر کے کتبے نے داماد کی جان لے لی

بدھ یکم اپریل کو واشنگٹن سے ملنے والی رپورٹوں کے مطابق اخبار سکرَینٹن ٹائمز ٹریبیون نے لکھا کہ یہ واقعہ ریاست پینسلوینیا کے شمال مشرق میں لیکاونّا کاؤنٹی میں پیر 30 مارچ کے روز پیش آیا۔ اس امریکی شہری کا نام اسٹیفن وائےٹَیک بتایا گیا ہے، جس کی عمر 74 برس تھی۔

اسٹیفن اپنی اہلیہ لُوسی کے ساتھ سال میں کئی مرتبہ مقامی سینٹ جوزف قبرستان جایا کرتا تھا۔ گزشتہ پیر کے روز، ایسٹر کے مقدس تہوار سے قبل وہ اپنی ساس کی قبر کے کتبے کی صفائی اور تزئین میں مصروف تھا کہ قریب 400 پاؤنڈ یا 180 کلوگرام وزنی یہ بہت بڑا پتھر اُسی کے اوپر آ گرا۔

پولیس کے مطابق اس کی وجہ یہ بنی کہ سردیوں کے اختتام پر بہار کے مقابلتاﹰ گرم موسم کی وجہ سے قبر کے اردگرد کی گیلی مٹی نرم پڑ گئی تھی۔ جب اسٹیفن اپنی ساس کی روح کی خوشی کے لیے قبر کے سرہانے قریب بیٹھے ہوئے کتبہ سجا رہا تھا تو عدم توازن کی وجہ سے یہ پتھر گرا اور اسٹیفن اس کے نیچے دب گیا۔

جب گرینائٹ پتھر کا بنا یہ کتبہ اسٹیفن کے اوپر گرا تو اس کی بیوی بھی اس کے پاس ہی کھڑی تھی۔ لُوسی نے فوری طور پر قبرستان کے نگران کو بلایا مگر دونوں مل کر بھی اسٹیفن کو پتھر کے نیچے سے نکالنے میں ناکام رہے۔

پھر جب تک پولیس موقع پر پہنچی، اسٹیفن منوں وزنی کتبے کے نیچے دم توڑ چکا تھا۔ قبرستان کے نگران کُوبیلس کے مطابق جس طرح اسٹیفن کا انتقال ہوا، وہ ناقابل یقین ہے۔ لُوسی نے، جس کی اسٹیفن سے شادی 46 برس قبل ہوئی تھی، اس حادثے کے بارے میں کہا، ’’سب کچھ بہت اچانک ہوا۔ اسٹیفن میری والدہ سے بہت پیار کرتا تھا۔‘‘