ساحر لدھیانوی کی 24 ویں برسی

ساحر کا اصل نام عبدالحئی تھا۔ 1938ء میں میٹرک کرنے کے بعد اُنہوں نے گورنمنٹ کالج لدھیانہ میں داخلہ لے لیا۔ اُسی زمانے میں اُنہوں نے سیاست میں حصہ لینا شروع کر دیا تھا۔ وہ دور پورے برصغیر پر انگریزی سامراج کے تسلط کا دور تھا۔ ساحر اُن نوجوانوں میں سے ایک تھے، جن کے دلوں میں وطن کی آزادی کی تڑپ موجود تھی۔ میرٹھ کے ایک ہفتے وار اخبار ’گرتی لہر‘ میں شائع ہونے والی اُن کی ایک نظم ’قسم اُن تنگ گلیوں کی، جہاں مزدور رہتے ہیں‘ ساحر کی پہلی نظموں میں سے ایک تھی۔

آغاز ہی سے ساحر کے فن میں سماج کی فرسودہ روایات کے خلاف بغاوت کا عنصر موجود تھا۔ وہ اپنی شاعری میں سماجی کی تلخ حقیقتوں کو نئے نئے زاویوں سے پیش کرتے تھے۔ مثلاً اپنے زمانہٴ طالب علمی ہی میں اُنہوں نے نظم ’تاج محل‘ لکھ کر بزرگوں کی پوری نسل کو چونکا دیا تھا۔ اِس نظم میں ساحر نے شاہ جہاں کی عظمت کے گیت گانے کی بجائے اُن سینکڑوں گمنام کاریگروں اور مزدوروں کے حق میں بات کی تھی، جنہوں نے اپنی محنت اور قابلیت سے اپنے شہنشاہ کے خواب کو حقیقت کا روپ دیا تھا۔ ساحر کی اس نظم کا آخری حصہ کچھ یوں ہے:

یہ عمارات و مقابر یہ فصیلیں یہ حصار
مطلق الحکم شہنشاہوں کی عظمت کے ستوں
سینۂ دہر کے ناسور ہیں کہنہ ناسور
جذب ہے ان میں ترے اور مرے اجداد کا خوں

میری محبوب! انہیں بھی تو محبت ہوگی!
جن کی صناعی نے بخشی ہے اسے شکلِ جمیل
ان کے پیاروں کے مقابر رہے بے نام و نمود
آج تک ان پہ جلائی نہ کسی نے قندیل

یہ چمن زار یہ جمنا کا کنارہ، یہ محل
یہ منقش درو دیوار یہ محراب یہ طاق
اک شہنشاہ نے دولت کا سہارا لے کر
ہم غریبوں کی محبت کا اڑایا ہے مذاق

میری محبوب! کہیں اور ملا کر مجھ سے

تقسیم ہند سے پہلے کے برسوں میں اپنی انگریز دشمنی کی بناء پر ساحر کو لدھیانہ چھوڑ کر لاہور جانا پڑا، جہاں اُنہوں نے اسلامیہ کالج میں داخلہ لے لیا۔ لاہور میں رہتے ہوئے اُن کے فن کو اور جلا ملی، وہ ترقی پسند تحریک سے وابستہ ہو گئے اور اُن کا نام فیض، علی سردار جعفری، کیفی اور مجاز جیسے نامور شعراء کے ساتھ لیا جانے لگا۔

ترقی پسند تحریک کے علمبرداروں میں سے ایک علی سردار جعفری ساحر کو فیض کے پائے کا کوئی بڑا شاعر تو نہیں مانتے تھے تاہم وہ اُن کی نظم کی خوبصورتی کے قائل تھے، حتیٰ کہ عالمی امن کے حوالے سے ساحر کی طویل نظم ’پرچھائیاں‘ کا دیباچہ بھی اُنہوں نے ہی لکھا تھا۔ اس نظم کے دنیا کی مختلف زبانوں میں تراجم ہوئے تھے۔

اپنے دیباچے میں علی سردار جعفری نے لکھا تھا:’’اچھی نظم کی خصوصیات وہی ہیں، جنہیں غالب نے حسن کی کیفیت بیان کرنے کے لیے چار لفظوں میں ادا کیا ہے، سادگی و پُرکاری، بے خودی و ہوشیاری۔ ان چاروں کیفیات کا امتزاج مشکل ہے لیکن جب یہ مشکل آسان ہو جاتی ہے تو نظم ایک مکمل پیکر حسن بن کر سامنے آتی ہے اور دلوں کو موہ لیتی ہے۔ ساحر نے ایک سادہ سی کہانی کو، جو بارہا ہم نے سنی ہے اور دیکھی ہے اور محسوس کی ہے اور نظر انداز کی ہے، اپنی رنگین بیانی اور آتش بیانی سے پُر کیف بنا دیا ہے۔ اُس کی سادگی اُس کے موضوع اور مواد میں ہے اور پُر کاری اُس تکنیک میں، جو شاعر نے استعمال کی ہے۔ بے خودی اس مکمل ہم آہنگی سے پیدا ہوئی ہے، جو شاعر کو اپنے موضوع سے ہے اور اس بے خودی کے عالم میں بھی اُس کے سماجی شعور نے اُسے ہوشیار رکھا ہے۔ اگر ہوشیاری نہ ہوتی تو رنگین بیانی میں آتش بیانی کی آمیزش نہ ہو سکتی اور نظم کا آخری حصہ نہ لکھا جاتا۔‘‘

ڈوئچے ویلے کے ساتھ اپنے ایک انٹرویو میں علی سردار جعفری نے نہ صرف اپنے دیباچے کا یہ اقتباس پڑھ کر سنایا تھا بلکہ نظم کی ’پرچھائیاں‘ کی آخری لائنیں بھی یہ کہتے ہوئے سنائی تھیں:’’ہندوستان اور پاکستان میں اس وقت دونوں طرف سے ایٹمی ہتھیاروں کی بات کی جا رہی ہے اور مَیں ایٹمی ہتھیاروں کا بہت دشمن ہوں۔‘‘

کہو کہ آج بھی ہم سب اگر خموش رہے
تو اس دمکتے ہوئے خاکداں کی خیر نہیں
جنوں کی ڈھالی ہوئی ایٹمی بلاؤں سے
زمیں کی خیر نہیں آسمان کی خیر نہیں

گزشتہ جنگ میں گھر ہی جلے مگر اس بار
عجب نہیں کہ یہ تنہائیاں بھی جل جائیں

گزشتہ جنگ میں پیکر جلے مگر اس بار
عجب نہیں کہ یہ پرچھائیاں بھی جل جائیں

تقسیمِ ہند کے زمانے میں ساحر بمبئی میں ایک زیرِ تکمیل فلم ’آزادی کی راہ پر‘ کے لیے گیت لکھ رہے تھے، جس میں پرتھوی راج ہیرو تھے۔ جب مشرقی پنجاب میں مسلمانوں کے قتلِ عام اور مسلمان آبادی کے انخلاء کا سلسلہ شروع ہوا تو ساحر کی والدہ لدھیانہ ہی میں تھیں۔ مسلمان مہاجرین کے ساتھ وہ بھی لاہور پہنچ گئیں۔ ساحر بھی بمبئی سے فوراً لاہور پہنچے۔ یہاں وہ مہاجرین کی حالتِ زار اور اُن کی بے سر و سامانی دیکھ کر لرز گئے اور کہہ اٹھے:

یہ منظر کون سا منظر ہے، پہچانا نہیں‌ جاتا
سیہ خانوں سے کچھ پوچھو شبستانوں پہ کیا گزری
چلو وہ کفر کے گھر سے سلامت آ گئے لیکن
خدا کی مملکت میں‌ سوختہ جانوں پہ کیا گزری

اور ساحر والدہ کو لے کر واپس بمبئی چلے گئے، جہاں نغمہ نگار کی حیثیت سے ایک بے مثال کیریئر اُن کا منتظر تھا۔ اُنہوں نے جن بے شمار فلموں کے لیے گیت تحریر کیے، اُن میں جال، پیاسا، نیا دور، برسات کی رات، دل ہی تو ہے، وقت، آ گلے لگ جا، داغ، گمراہ، ہمراز، سزا، کاجل اور کبھی کبھی بھی شامل ہیں۔

’تلخیاں‘ کے نام سے ساحر کا پہلا شعری مجموعہ 1943ء ہی میں شائع ہو چکا تھا۔ ’گاتا جائے بنجارہ‘ گیتوں کا انتخاب تھا۔ ’آؤ کہ کوئی خواب بُنیں‘ اُن کا دوسرا مجموعہٴ کلام تھا، جو 1971ء میں شائع ہوا۔ اُنہیں اُن کی ادبی خدمات کے بدلے میں متعدد اعزازات سے نوازا گیا، جن میں حکومتِ بھارت کی جانب سے 1971ء میں دیا جانے والی پدم شری کا اعلیٰ اعزاز بھی شامل تھا۔