دنیا کے دس پسندیدہ اور بلند ترین ڈھانچے
آپ نیچے دیکھتے ہی ڈر جائیں گے۔ ایفل ٹاور کی تعمیر کے 125 برس بعد بھی دنیا بھر سے سیاح اسے دیکھنے کے لیے پیرس جاتے ہیں۔ دنیا کے دس پسندیدہ اور بلند ترین ڈھانچوں پر ایک نظر
انجینئرنگ کا عجوبہ
ایفل ٹاور گوسٹاف ایفل نے سن 1889ء میں تعمیر کیا تھا۔ اس وقت اسے انجینئرنگ کا عجوبہ قرار دیا گیا تھا۔ 1930ء تک 324 میٹر اونچے اس ٹاور کو دنیا کے بلند ترین ڈھانچے کا اعزاز حاصل رہا۔
برج خلیفہ
دنیا کی بلند ترین عمارت ہونے کا اعزار متحدہ عرب امارات میں واقع برج خلیفہ کو حاصل ہے۔ دبئی کی اس 829 میٹر بلند عمارت کا افتتاح جنوری 2010ء میں ہوا تھا۔ اس میں رہائشی اپارٹمنٹس، ہوٹل اور متعدد کاروباری دفاتر واقع ہیں۔
بلند ترین کلاک ٹاور
مکہ میں واقع ابراج البیت دنیا کا بلند ترین کلاک ٹاور ہے۔ اس کے علاوہ دنیا کی تیسری بلند ترین عمارت بھی ہے۔ 2012ء میں مکمل ہونے والا 601 میٹر اونچا یہ ٹاور دنیا کی سب سے بڑی اور مسلمانوں کے لیے مقدس ترین مسجد الحرام کے ساتھ واقع ہے۔
بلند ترین مجمسہ
یہ صرف عمارتیں ہی نہیں ہیں، جن کی طرف سیاح کھنچے چلے آتے ہیں۔ چینی علاقے لشان میں سپرنگ ٹیمپل میں موجود بدھا کا یہ مجسمہ دنیا کا بلند ترین ہے۔ 153 میٹر بلند اس مجسمے کی تعمیر 2008ء میں مکمل ہوئی تھی۔ طالبان کے ہاتھوں بامیان میں بدھا کے مجسمے کی تباہی کے فورا بعد اس کی تعمیر کا اعلان کیا گیا تھا۔
دی مدر لینڈ کالز
دی مدر لینڈ کالز نامی یہ مجسمہ 1967ء میں روسی شہر وولگوگراڈ میں بنایا گیا۔ اُس وقت اسے دنیا کے سب سے بڑے مجسمے کے نام سے پکارا گیا۔ کنکریٹ کی مدد سے بنائے جانے والے اس مجمسے کی تلوار کی نوک سے بنیاد تک کی لمبائی 87 میٹر ہے۔
افریقہ کا بلند ترین مجسمہ
دنیا کے بلند ترین مجمسوں کی فہرست میں افریقہ کے ’دی افریقن رینائسنس‘ کا بھی شمار ہوتا ہے۔ تانبے کا 49 میٹر اونچا یہ مجسمہ سینیگال کے شہر ڈاکار کے قریب واقع ہے۔ اس کی تعمیر 2010ء میں مکمل ہوئی تھی اور سن 1959 میں فرانس سے آزادی کی یادگار کی طور پر بنایا گیا تھا۔
لیڈی لبرٹی
امریکی شہر نیویارک میں واقع 46 میٹر اونچے اس مجسمے کا شمار ان مجسموں میں ہوتا ہے، جن کی ممکنہ طور دنیا میں سب سے زیادہ تصویریں کھینچی گئی ہیں۔ 1886ء میں تعمیر ہونے والے آزادی کے اس آئیکون کو سالانہ تقریباﹰ چار ملین افراد دیکھنے جاتے ہیں۔
گیٹ وے ٹو وائلڈ ویسٹ
امریکا میں سینٹ لوئس آرک نامی یہ گیٹ وے سیاحوں کے لیے ایک بڑی کشش ہے۔ میسوری میں مسیسیپی دریا کے اوپر بنائے گئے 192 میٹر لمبے اس گیٹ وے کو امریکن ویسٹ کے لیے دروازہ قرار دیا جاتا ہے۔ اس کی تعمیر 1965 میں ہوئی۔
سب سے بلند مینار
جرمنی کے شہر اُلم میں واقع اس چرچ کو اُلم منسٹر کے نام سے پکارا جاتا ہے۔ اس چرچ کی تعمیر کا آغاز سن 1377 میں ہوا اور اسے آج بھی سب سے اونچے مینار والا چرچ قرار دیا جاتا ہے۔ اس کے مینار کی لمبائی 161.5 میٹر ہے۔
قدیم ترین اور مشہور
بلند ترین عمارتوں کی بین الاقوامی فہرست میں مصر کے اس پیرامِڈ کو قدیم ترین ڈھانچے کے طور پر تسلیم کیا گیا ہے۔ اندازوں کے مطابق اس کی تعمیر 2560 قبل از مسیح کی گئی۔ تقریبا تین ہزار آٹھ سو برس تک یہ دنیا کا بلند ترین ڈھانچا رہا۔