د پيښور د بريد په تړاو ۵ تنه په افغانستان کي نيول سوي
۱۳۹۳ دی ۲۶, جمعه
د افغانستان یوه امنیتي چارواکي دغه رپوټ تصدیق کړی دی او ويلي يې دي، چې دغه پنځه تنه اوس تر پوښتنو گروېږنو لاندي دي. یوه پاکستاني چارواکي د آلمان خبري آژانس ته وویل چې دغه مشکوک کسان وروسته له هغې ونیول شول چې د افغانستان حکومت ته د پاکستان له خوا ځیني معلومات ورکړل شول. په رپوټ کې د افغان او پاکستاني چارواکو په حواله ویل شوي دي چې دغه کسان به په راتلونکو ورځو کې «وسپارل شي.»
د تيرکال د دسمبر مياشتي پر ۱۶ نېټه ۷ تنه پاکستاني طالبان په پيښور کې د پاکستان د پوځ یوه ښونځي ته ننوتل او نزدې ۱۵۰ تنه ېې وژل چې ډير يې د ښونځي زده کوونکي ول.
پاکستاني او افغان چارواکو وویل چې د پاکستان د استخباراتي ادارې مشر تیره اونۍ کابل ته تللی وو او ویل شوي دي چې د افغانستان له جمهور رئيس محمد اشرف غني سره يې ولیدل او د دغو مشکوکو کسانو د نيولو او تسلیمولو په هکله يې خبري کړي دي.
په اسلام آباد کې د پالیسي د مطالعاتو په انستیتوت کې د امنیتي چارو څیړونکي، عرفان شهزاد وویل چې د تروریستي فعالیتونو پر ضد مبارزه کې د افغانستان د همکارۍ دغه نوې هڅه په حقیقت کې د «سپتمبر د ۱۱ تر پيښي وروسته د ترهگرۍ د ریښو د له مینځه وړلو په مقصد په اول وار د پاکستان د جدیت ښکارندوی دی.»
په امنیتی برخو کې د کابل او اسلام آباد نوي همکارۍ
شهزاد د آلمان خبري آژانس ته وویل: «موږ باید انتظار وباسو چې دغه نوې هڅه د سیمې پر راتلونکي باندي څه اغیزه کوي. خو سر له دې هم دا ظاهرا یوه ډيره مهمه نښانه ده.»
په عین وخت کې د افغانستان د استخباراتي ادارې یوه چارواکي وویل چې د پيښور د حملې د مشکوکو او د پکتیکا د واليبال لوبې پر نندارچیانو برید د مشکوکو عاملینو د تبادلې په هکله خبري رواني دي.
په پکتيکا کې د ځانمرگي برید په نتیجه کې نزدې۵۰ کسان هغه مهال ووژل شول چې د والیبال د یوې سیالۍ نندارې ته راغلي ول.
د افغانستان استخباراتي ادارې د دغې حملې مسئولیت پر حقاني ترهگري شبکې باندي اچولی دی. ویل کیږي چې دغه ډله په پاکستان کې مقر لري او له طالبانو سره نژدې همکاره ډله گڼله کیږي.