د دیوالي جشن
دیوالي د هندوانو یو مذهبي جشن دی، چې هغوی یې په ټوله نړۍ کې لمانځي. دغه جشن ته د رڼاگانو جشن هم ویل کیږي. په دغه ورځ د کورنۍ غړي د خپلوانو او دوستانو له پاره ډالۍ رانیسي.
اور لوبې یا اتش بازي او پټاقې د دیوالي د جشن لازمه برخه گڼل کیږي. خو سږ کال چارواکو د چاپيریال د پاک ساتلو په نظر کې نیولو سره، د «زرغونې دیوالۍ» د لمانځلو اعلان کړی دی، څو د اتش بازۍ له کبله د رامنځ ته کیدونکي چټلۍ مخنیوی وشي.
زیاتره هندوان پر دې باور دي چې تر دیوالي د مخه د سرو زرو رانیول خوشحالي او سوکالي راولي. له دې کبله هغوی تر دیوالي د مخه سره زر رانیسي.
دیوالي یو داسې جشن دی چې د کورنۍ ټول غړي یې یو ځای لمانځي. پر دغه ورځ یو بل ته تحفې ورکول کیږي او خواږه تقسمیږي. دغه جشن هر کال د اکتوبر له نیمایي څخه د نومبر تر نیمایي پورې په یوه ورځ لمانځل کیږي.
د دیوالي پر ورځ د کور پر ځمکه باندې د رنگارنگ انځورونو جوړل د دغه جشن مهمه برخه ده. په دودیزه توگه دغه انځورونه د کور عمومي دروازې ته څیرمه کښل کیږي. پر دې سربیره کورونه په بېلابېلو ډیوو سره سینگاریږي.
پخوا په دغو لاس جوړو شوو ډیوو سره کورونه او لارې کوڅې سینگاریدې، خو اوس د دې ځای له چین څخه وارد شویوارزان بیه څراغونو نیولی دی. په دې سره په هند کې په لاس جوړو شوو ډیوو د کاروبار د له منځه تللو له خطر سره مخامخ شوی.
ډیری خلک په دې باور دي چې پر دغه ورځ د چا کور ته خالي لاس تلل بد شگون راوړي. آن یو شمیر شرکتونه په دغه ورځ خپلو کارکوونکو ته تحفې ورکوي او یا اضافي پیسې.
د دیوالي جشن پر مهال ډیری ښځې خپل لاسونه پر نکریزو سره کوي. دا نو پر لاسونو د نکریزو د نقاشۍ د کاروباریانو له پاره په کال کې د عاید تر ټولو ښه وخت دی.
په هندوستان کې یوازې هندوان د دیوالي جشن نه لمانځي. دغه انځور د هندوستان د اترپردیش ایالت د مرزاپور د ښار دی، چیرې چې یو څو مسلمانې نجونې په خپل منځ کې د انسانانو تر منځ د ورورگلولۍ د ژوند تیرولو له پاره دعا کوي. که څه هم دیوالي د هندوانو یو مذهبي جشن دی، خو د نورو مذهبونو ادیان هم په هندوستان کې دغه جشن لمانځي.