’خوبصورت دماغ‘ کار حادثے میں ہلاک

امریکی نشریاتی ادارے اے بی سی کے مطابق جون نیش اتوار کے روز اپنی اہلیہ کے ہمراہ ایک ٹیکسی میں سفر کر رہے تھے کہ گاڑی ڈرائیور کے قابو سے باہر ہو کر سڑک کنارے نصب حفاظتی بند سے جا ٹکرائی۔ اے بی سی نے مقامی پولیس کے حوالے سے بتایا کہ ٹیکسی کو یہ حادثہ نیوجرسی میں پیش آیا۔

مقامی پولیس ترجمان گریگوری وِلیمز نے بتایا کہ اس حادثے کے نتیجے میں جون نیش اور ان کی اہلیہ گاڑی سے باہر جا گرے اور موقع پر ہی ہلاک ہو گئے۔

یہ بات اہم ہے کہ اس شہرہء آفاق ریاضی دان کو سن 1994ء میں معاشیات کا نوبل انعام دیا گیا تھا۔ انہوں نے گیم تھیوری اور فیصلہ سازی کی ریاضیات پر بے انتہا کام کیا۔

جون نیش نے اپنی زندگی کا ایک طویل عرصہ واہمے کی بیماری سے جنگ میں بھی صرف کیا اور اسی جدوجہد کی کہانی کو ہالی ووڈ کی فلم ’آ بیوٹیفل مائنڈ‘ یا ’ایک خوبصورت دماغ‘ میں پیش کیا گیا۔ اس فلم میں رسل کرو نے مرکزی کردار ادا کیا تھا اور اس فلم کو آسکر انعام ملا تھا۔

اس حادثے کی خبر سامنے آنے کے بعد کرو نے سماجی رابطے کی ویب سائٹ ٹویٹر پر لکھا کہ وہ نیش اور ان کی اہلیہ ایلیسا کی ہلاکت کی خبر سن کو دھچکے میں آ گئے ہیں۔ ’ایک غیرمعمولی رفاقت، خوبصورت دماغ اور خوبصورت دل۔‘