جموں و کشمیر میں پہلی بار ہندو قوم پرست بھی اقتدار میں

اس طرح یہ پہلا موقع ہو گا کہ مسلمانوں کی اکثریت والی بھارتی ریاست جموں و کشمیر میں ہندو قوم پسندوں کی پارٹی بی جے پی حکومت سازی کرے گی۔ حالیہ ریاستی الیکشن میں کسی بھی پارٹی کو بھاری اکثریت نہیں مل سکی تھی۔ اسی لیے حکومت سازی کا عمل التوا کا شکار تھا۔ مخلوط حکومت کے قیام سے متعلق نئی دہلی میں مذاکرات وزیر اعظم نریندر مودی اور جموں و کشمیر کی پیپلز ڈیموکریٹک پارٹی کے سربراہ مفتی محمد سعید نے کیے۔ مفتی محمد سعید نئے ریاستی وزیر اعلیٰ ہوں گے۔ ان کی حلف برداری آئندہ اتوار کے روز متوقع ہے۔

نئی دہلی میں ملکی وزیر اعظم مودی کے ساتھ اپنی حتمی بات چیت کے بعد مفتی محمد سعید کا کہنا تھا، ’’ہمیں مشترکہ بنیاد مل گئی ہے۔ ہم نے حکومت سازی کے تمام پہلوؤں پر بحث کی ہے۔ جموں و کشمیر کے عوام کے دلوں اور اذہان کو جوڑنے کا یہ ایک نادر موقع ہے۔‘‘

ہمالیہ کی یہ شورش زدہ ریاست روایتی طور پر پیپلز ڈیموکریٹک پارٹی پی ڈی پی اور دوسری علاقائی جماعت نیشنل کانفرنس کے غلبے والی ریاست رہی ہے۔ ہندو قوم پرست جماعت بی جے پی پہلی بار اس ریاست میں مد مقابل کے طور پر اُبھر کر سامنے آئی ہے۔ اس پارٹی کو ہندوؤں کی اکثریت والے علاقے جموں میں کامیابی ملی تاہم مسلم اکثریتی آبادی والی وادی کشمیر میں اس پارٹی کو ایک بھی سیٹ نہ مل سکی۔ کشمیر میں پیپلز ڈیموکریٹک پارٹی نے شاندار کامیابی حاصل کی۔ اس طرح بی جے پی اور پی ڈی پی نے مل کر مخلوط حکومت بنانے کا فیصلہ کیا۔

دونوں اتحادی جماعتیں بھارتیہ جنتا پارٹی اور پیپلز ڈیموکریٹک پارٹی نظریاتی طور پر چند کلیدی نوعیت کے مسائل کے ضمن میں ایک دوسرے سے متضاد موقف رکھتی ہیں۔ مثال کے طور پر ریاست کی ایک خصوصی خود مختار حیثیت اور جموں و کشمیر میں تعینات بھارتی فوجی دستوں کی تعداد کے بارے میں دونوں کے مابین گہرے اختلافات پائے جاتے ہیں۔

ریاست جموں و کشمیر میں سے کشمیر دو حصوں میں منقسم ہے۔ کشمیر کا ایک حصہ بھارت کے زیر انتظام ہے اور دوسرا پاکستان کی عملداری میں ہے۔ پاکستان اور بھارت پڑوسی ممالک ہونے کے باوجود ایک دوسرے کے روایتی حریف ہیں۔ جنوبی ایشیا کی ان دونوں جوہری طاقتوں کے مابین جنگیں بھی ہو چکی ہیں، جن میں سے دو جنگوں کی وجہ کشمیر ہی کا تنازعہ بنا تھا۔

بھارتی حکومت بار ہا پاکستان پر کشمیری عسکریت پسندوں کی مدد اور اُن کی پشت پناہی کا الزام عائد کرتی رہی ہے جبکہ اسلام آباد کی طرف سے ہمیشہ ایسے الزمات کی تردید کی جاتی رہی ہے۔ پاکستان کشمیری عسکریت پسندوں کو اپنی آزادی کی جنگ لڑنے والے حریت پسند قرار دیتا ہے۔

بھارتی وزیر اعظم نریندر مودی خود بھی ایک ہندو قوم پرست سیاستدان ہیں لیکن ان کا المیہ یہ ہے کہ اب ان کی اپنی سیاسی جماعت میں سے ایسے مذہبی انتہا پسندوں کی آوازیں بلند سے بلند تر ہوتی جا رہی ہیں، جو مودی سے مسلسل یہ مطالبے کر رہے ہیں کہ وہ سیاست میں اپنی پوری توجہ ہندو قوم پسندانہ ایجنڈے پر مرکوز رکھیں۔