بھیڑیوں سے ریوڑ بچانے کے لیے گدھوں کی خدمات

جرمن نیوز ایجنسی ڈی پی اے نے اپنے ایک جائزے میں بتایا ہے کہ جرمنی میں زیادہ سے زیادہ کسان اپنی بھیڑوں کی حفاظت کے لیے اب یہ طریقہ استعمال کرنے کا پروگرام بنا رہے ہیں۔ جرمن صوبے لوئر سیکسنی کے علاقے ٹویسٹرنگن کے ایک کسان ٹِینو بارتھ نے ڈی پی اے کو بتایا:’’بھیڑوں کے برعکس گدھوں کی جبلت میں موقع سے فرار ہونا شامل نہیں ہے۔ گدھا حملہ آور درندے کا سامنا کرتا ہے اور اُسے بھگانے کی کوشش کرتا ہے، پہلے شور مچا کر اور پھر دولتیوں کی مدد سے۔‘‘

بارتھ نے بتایا کہ اُس نے اپنی دو سو بھیڑوں کی حفاظت کے لیے حال ہی میں تین گدھے خریدے ہیں۔ اُس کا کہنا تھا کہ بھیڑیوں، کتوں یا پھر جنگی بِلّوں کی طرف سے حملوں کی صورت میں گدھے بھیڑوں کو تحفظ فراہم کرتے ہیں:’’گدھے خطرے کے وقت جو آوازیں نکالتے ہیں، وہ خوفزدہ کر دینے والی ہوتی ہیں۔‘‘

جب گدھوں کو ریوڑ کا حصہ بنا دیا جاتا ہے تو وہ بھیڑوں کو اکٹھا رکھنے میں مدد دیتے ہیں اور اُنہیں بھاگنے سے روکتے ہیں کیونکہ بھیڑوں کے بھاگنے سے بھیڑیوں کو حملہ کرنے کی اور زیادہ تحریک ملتی ہے۔

ڈی پی اے کی اس رپورٹ میں بتایا گیا ہے کہ جرمن صوبے سیکسنی انہالٹ کے بہت سے کسان پہلے ہی اپنے ریوڑوں کی حفاظت کے لیے گدھے حاصل کر چکے ہیں۔

واضح رہے کہ حالیہ برسوں کے دوران جرمنی میں بھیڑیوں کی تعداد میں بڑے پیمانے پر اضافہ دیکھنے میں آیا ہے۔ وولفس ریجن لاؤزِٹس نامی منصوے کے اندازوں کے مطابق آج کل جرمنی میں بھیڑیوں کی تعداد دو سو تک پہنچ چکی ہے، جو پچیس مختلف گروپوں کی شکل میں رہ رہے ہیں۔ گزشتہ دو برسوں کے دوران بھیڑیوں کی تعداد میں دگنا اضافہ دیکھا گیا ہے۔ نوجوان نر بھیڑیے عام طور پر اپنے گروپ سے الگ ہو کر بھیڑوں کا شکار کرتے ہیں۔