بھینس سے لے کر چوہے تک سب ’طاقت کی دیوی‘ کی نذر

جانوروں کے حقوق کے لیے کام کرنے والے کارکنوں کی طرف سے واویلا مچائے جانے کے باوجود طاقت کی دیوی کے ہندو پجاریوں نے نیپال میں ہزاروں جانوروں کی گردن مار دی۔ تلوار بردار ہندو بھگتوں نے بھارتی سرحد کے قریب واقع بڑیاپور گاؤں کو دو روزہ تہوار کے موقع پر کسی بوچڑخانے میں تبدیل کر دیا ہے۔ اس تہوار میں بھینس سے لے کر چوہے تک ہر طرح کے جانور کے گلے کو تلوار سے چیر ڈالنے کی رسم ادا کی جا رہی ہے۔ خبر رساں اداروں کے مطابق ہندو بھگت اس گاؤں کو دنیا کے سب سے بڑے بوچڑخانے میں تبدیل کرنے پر مائل دکھائی دیتے ہیں۔

مقامی پجاری منگل چودھری نے ہندو دیوی گدھِیمائی کے مندر پر جانوروں کے بھینٹ چڑھانے کے مقام پر کہا، ’تہوار شروع ہو چکا ہے اور سب انتہائی جذباتی ہیں‘۔

ان کا مزید کہنا تھا، ’تمام صبح دیگر ساری رسمیں خوش اسلوبی سے ادا کی جاتی رہیں اور اب قربانی کا سلسلہ شروع ہو چکا ہے‘۔

اس تہوار میں پہلا روز بھینسوں کی قربانی کے لیے مختص کیا گیا ہے، جب کہ اگلے روز دیگر جانوروں کی گردنوں پر تیزدھار تلواریں اور خنجر پھیر دیے جائیں گے۔

تین گھنٹے کی مسافت طے کر کے اس گاؤں تک پہنچنے والے 55 سالہ کسان ستیارام یادو نے بتایا کہ یہاں ایک جشن جیسا ماحول ہے اور ہزاروں بھگتوں نے اس پورے علاقے میں ڈیرے ڈال رکھیں ہیں۔ یادو نے بتایا کہ وہ اپنے خاندان کے تحفظ اور ترقی کے لیے ایک بکری قربان کرنے کے لیے ساتھ لایا ہے۔ ’’اگر آپ دیوی پر یقین کر لیں، تو آپ کی ساری مرادیں پوری ہو جائیں۔‘‘

اس تہوار کا آغاز گزشتہ شب ہوا، جب علامتی طور پر ایک بکری، چوہے، مرغی، سؤر اور کبوتر کو ذبح کیا گیا۔ اس موقع پر سکیورٹی کے سخت ترین انتظامات کیے گئے ہیں جب کہ قربان گاہ میں 12 سو پولیس اہلکار مسلسل گشت پر ہیں۔

بتایا گیا ہےکہ اس مقام پر سن 2009ء میں تقریباﹰ تین لاکھ جانوروں کے گلے کاٹ کر سر علیحدہ کر دیے گئے تھے۔ سکیورٹی حکام کے مطابق تہوار کے مقام پر الکوحل مصنوعات کی فروخت اور استعمال پر پابندی عائد ہے، کیوں کہ نشے میں بھگتوں کے درمیان لڑائی کا بھی خطرہ ہے۔

یہ بات اہم ہے کہ طاقت کی دیوی کے نام سے منسوب گدھیمائی مندر جنوبی نیپال میں بھارتی سرحد کے قریب بڑا ضلع میں واقع ہے۔ یہاں صدیوں سے جاری اس رسم میں ہندو بھگت اس امید کے ساتھ جانوروں کے گلے کاٹتے ہیں کہ ان کی تمام تر خواہشات پوری ہو جائیں گی۔ اس تہوار میں شرکت کرنے والے افراد کی تعداد پانچ ملین کے قریب بتائی جاتی ہے۔

جانوروں کے حقوق کے لیے کام کرنے والے کارکنان اس تہوار پر شدید تنقید کرتے ہیں، تاہم نیپالی حکومت کے مطابق صدیوں پرانے اس تہوار کو روکنا اس کے بس میں نہیں۔