بن غازی میں فوج اور اسلامی ملیشیا کے درمیان جھڑپیں، کم از کم 16 افراد ہلاک

خبر رساں ادارے ڈی پی اے نے طبی اور فوجی ذرائع کے حوالے سے بتایا ہے کہ ہلاک ہونے والوں میں تین عام شہری بھی شامل ہیں، جن میں سے ایک مصری باشندہ ہے۔ بتایا گیا ہے کہ یہ سویلین افراد اس وقت ہلاک ہوئے، جب ایک راکٹ ایک مکان پر لگا۔

پیر کے روز مشرقی شہر بن غازی میں ملکی فوج اور اسلامی شدت پسند گروپ کے جنگجوؤں کے درمیان تازہ جھڑپوں کا آغاز اس وقت ہوا، جب اس گروہ کے مسلح حملہ آوروں نے ایک فوجی چوکی پر حملہ کیا۔ اس کے بعد فوجیوں اور عسکریت پسندوں کے درمیان جھڑپیں شروع ہو گئیں، جب کہ اس کارروائی میں فوج نے ہیلی کاپٹروں اور لڑاکا طیاروں کا استعمال بھی کیا۔ خبر رساں ادارے روئٹرز کے مطابق بن غازی میں ان جھڑپوں میں اب تک 81 افراد زخمی بھی ہوچکے ہیں۔

بن غازی میں یہ جھڑپیں ایک ایسے موقع پر شروع ہوئی ہیں، جب دارالحکومت طرابلس میں گزشتہ ایک ہفتے سے دو ملیشیا گروہ بین الاقوامی ہوائی اڈے پر کنٹرول کے لیے ایک دوسرے کے خلاف برسرپیکار ہیں۔ لیبیا کی حکومت کی جانب سے اس سلسلے میں عالمی برادری سے مدد کی اپیل بھی کی گئی ہے۔

طرابلس میں پیر کے روز قدرے سکون رہا، تاہم بن غازی میں انصار الشریعہ سے منسلک ملیشیا گروہ نے ایک فوجی کیپ پر حملہ کر دیا۔ بتایا گیا ہے کہ اس حملے کو فوج اور باغی جنرل خلیفہ ہفتر کے حامی فوجیوں نے ناکام بنا دیا۔ واضح رہے کہ خلیفہ ہفتر اسلامی گروہوں کے خلاف اپنے طور پر اعلان جنگ کیے ہوئے ہیں۔

روئٹرز نے ایک سکیورٹی اہلکار کے حوالے سے بتایا ہے کہ انصار الشریعہ کے عسکریت پسند اس فوجی اڈے پر قبضہ کرنا چاہتے تھے، تاہم خصوصی فورسز اور ہفتر کے فوجیوں نے ان کا مقابلہ کیا اور فوجی جہاز اور ہیلی کاپٹروں کا استعمال کرتے ہوئے ان عسکریت پسندوں کو پسپا کر دیا۔

واضح رہے کہ سن 2011ء میں معمر قذافی کے خلاف مسلح تحریک کا آغاز ہوا تھا، جب بالآخر معمر قذافی کے کئی دہائیوں پر پھیلے اقتدار کے خاتمے اور ان کی موت کی صورت میں برآمد ہوا، تاہم لیبیا میں اس کے بعد اب تک سلامتی کی صورتحال درست نہ ہو سکی۔ روئٹرز کے مطابق ملک میں موجود ملیشیا گروہ انتہائی مضبوط ہو چکی ہے اور مقامی حکومت ان گروہوں کو غیرمسلح کرنے میں مسلسل ناکام دکھائی دیتی ہے۔