’بغیرشادی ساتھ‘ کی ترویج، ایرانی عدالت نے میگزین بند کر دیا

پیر کے روز ایرانی اخبار شرغ میں شائع ہونے والی ایک رپورٹ کے مطابق اسلامی جمہوریہ ایران میں شادی کے بغیر کسی بھی قسم کا جنسی تعلق جرم ہے اور اسی تناظر میں اس جریدے کو بند کرنے کے احکامات صادر کیے گئے۔

سن 1979ء میں آنے والے اسلامی انقلاب کے بعد ایران میں نافذ کئے گئے شرعی قوانین کے مطابق شادی کے بغیر کسی بھی قسم کا جنسی تعلق قائم کرنا جرم کے زمرے میں آتا ہے، جس کی سزا کوڑوں سے لے کر سنگ ساری تک ہے۔

گزشتہ برس ماہنامہ زنانِ امروز نے ایک خصوصی ضمیمہ شائع کیا تھا، جس میں ’وائٹ میریج‘ یا بغیرنکاح ساتھ رہنے کی مختلف وجوہات کے ساتھ ساتھ یہ بھی بتایا گیا تھا کہ ایران میں ایسے جوڑوں کی تعداد میں مسلسل اضافہ ہو رہا ہے، جو نکاح کیے بغیر ایک دوسرے کے ساتھ رہنے پر مائل ہو رہے ہیں۔

شرغ میں شائع ہونے والی رپورٹ کے مطابق، ’زنانِ امروز کی اشاعت پر پابندی عائد کر دی گئی ہے کیوں کہ وہ وائٹ میرج کی تاویلات پیش کرتا تھا اور اس کی ترغیب دیتا تھا۔‘

ایران کے سپریم لیڈر آیت اللہ علی خامنہ ای کے دفتر سے گزشتہ برس ایک حکم نامہ جاری کیا گیا تھا، جس کے مطابق ملک میں بغیرشادی ساتھ رہنے والے جوڑوں کے خلاف کارروائی اور اس رجحان کی حوصلہ شکنی کرنے کی ہدایات دی گئی تھیں۔ اس حکم نامے میں ایسے رجحاں کو ’اسلامی اقدار کے منافی‘ اور باعثِ شرم قرار دیا گیا تھا۔

ایران کے نوجوانوں اور کھیل کے امور کی وزارت نے ’وائٹ میرج‘ کے رجحان میں اضافے کا ذ‌مہ دار میڈیا کو قرار دیتے ہوئے کہا تھا کہ وہ اس فعل کی ترغیب دیتا ہے۔

خبر رساں ادارے روئٹرز کے مطابق ایرانی قانون کسی خاتون کے لیے طلاق حاصل کرنا انتہائی دشور بنا دیتا ہے، جس کی وجہ سے بغیرشادی کسی اور شخص کے ساتھ رہنے کے رجحان کو ترویج مل رہی ہے۔ تاہم ایرانی قانون ساز خواتین کے لیے طلاق کے حصول میں دشواریوں کے الزامات کو مسترد کرتے ہوئے، اس بابت سخت قواعد کو ’اسلامی قوانین کا نفاذ‘ قرار دیتے ہیں۔