برہنہ تصاویر کی چوری پر ایپل کی وضاحت

ہالی وُڈ کی اداکاراؤں کی برہنہ تصاویر کی چوری کے بعد ایپل کے آن لائن اسٹوریج سسٹم آئی کلاؤڈ پر سوال اٹھائے جا رہے ہیں۔ ایپل کو ایک ایسے وقت پر اس صورتِ حال کا سامنا کرنا پڑا ہے، جب اس کے نئے آئی فون کو متعارف کروائے جانے کی تقریب کچھ زیادہ دُور نہیں ہے۔

ایپل نے اس تنازے میں اپنے نظام کا دفاع کیا ہے۔ اس کمپنی کا کہنا ہے کہ آسکر ایوارڈ یافتہ اداکارہ جینیفر لارنس سمیت اداکاراؤں کی برہنہ تصاویر بظاہر شوبز کی ان ہستیوں کے آئی کلاؤڈ کے اکاؤنٹس ہیک ہونے کے نتیجے میں عام ہوئی ہیں۔

ایپل کا کہنا ہے کہ متاثرہ اداکاراؤں کے اکاؤنٹس کو ہدف بنایا گیا ہے  اور یہ مسئلہ ایپل کے سسٹمز تک غیرقانونی رسائی کا نتیجہ نہیں ہے۔ جینیفر لارنس کے علاوہ جن اداکاراؤں کے اکاؤنٹ ہیک ہوئے ان میں گلوکارہ ریحانا، اداکارہ میری الزبتھ وِنسٹیڈ، ماڈل کیٹ اُپٹون، اداکارہ کرسٹن ڈنسٹ کے ساتھ ساتھ ممکنہ طور پر درجنوں مزید معروف ہستیاں بھی شامل ہیں۔

وِنسٹیڈ کہہ چکی ہیں کہ ان کی برہنہ تصاویر بھی انٹرنیٹ پر جاری کی گئی ہیں۔ ان کے ساتھ ساتھ متعدد اداکاراؤں کی برہنہ تصاویر انٹرنیٹ پر پوسٹ کی گئی تھیں۔ تاہم بہت سی تصاویر کے اصلی ہونے کی تصدیق نہیں ہو سکی۔ یہ بھی پتہ نہیں چل سکا کہ تصاویر کس نے جاری کی ہیں۔

ایپل نے منگل کو ایک بیان میں کہا: ’’ہمیں پتہ چلا ہے کہ شوبز کی مخصوص ہستیوں کے اکاؤنٹس تک غیرقانونی رسائی حاصل کی گئی، ان کے یوزر نیمز، پاس ورڈز اورسکیورٹی سوالات کا پتہ چلایا گیا، یہ ایک ایسا طریقہ ہے جو انٹرنیٹ پر معمول بن چکا ہے۔‘‘

ایپل کا مزید کہنا تھا: ’’ہم نے جن معاملات کی تفتیش کی ہے ان میں سے کسی میں بھی آئی کلاؤڈ یا فائنڈ مائی آئی فون سمیت ایپل کے کسی بھی سسٹم کا سکیورٹی حصار ٹوٹنا ثابت نہیں ہوا۔‘‘

واضح رہے کہ امریکی تفتیشی ادارہ  ایف بی آئی بھی اس معاملے کی تفتیش شروع کرنے کا اعلان کر چکا ہے۔ ایف بی آئی کے مطابق وہ کمپیوٹرز تک غیرقانونی رسائی اور معروف ہستیوں سے متعلقہ مواد کے غیر قانونی اجراء سے متعلق الزامات سے آگاہ ہے اور معاملے کی جانچ کی جا رہی ہے۔

جینیفر لارنس نے  اتوار کو تصاویر سامنے آنے پر حکام سے رابطہ کیا تھا۔ وہ تین مرتبہ آسکر ایوارڈ کے لیے نامزد ہو چکی ہیں جبکہ ’سِلور لائننگز پلے بُک‘ کے لیے وہ یہ ایوارڈ جیت بھی چکی ہیں۔