’برقعہ پوش خواتین کو علیحدہ بٹھانے کا منصوبہ ترک‘

اس منصوبے کے تحت برقعے میں ملبوس یا نقاب اوڑھنے والی خواتین کو پارلیمنٹ کی کارروائی دیکھنے والوں کے لیے مخصوص ایک علیحدہ حصے میں بٹھایا جانا مقصود تھا۔ تاہم شدید مخالفت کے بعد پیر کو یہ منصوبہ واپس لینے کا اعلان کر دیا گیا۔

پارلیمنٹ کے اسپیکر برونوین بشپ اور سینیٹ کے صدر اسٹیفن پیری نے دو اکتوبر کو فیصلہ کیا تھا کہ ایسی خواتین کو شیشے لگے ان حصوں میں علیحدہ بٹھایا جائے گا جو عام طور پر پارلیمنٹ کے دورے کے لیے آنے والے اسکول کے بچوں کے لیے مخصوص ہوتے ہیں تاکہ ان کے شور سے پارلیمنٹ کی کارروائی متاثر نہ ہو۔

یہ فیصلہ اسلامی ریاست گروہ کے ابھرنے کے بعد ممکنہ سکیورٹی خدشات پر ہونے والی بحث کے نتیجے میں کیا گیا تھا۔ تاہم ہیومن رائٹس اور نسلی امتیاز کے گروپوں نے اس فیصلے کی مذمت کی تھی۔

خبر رساں ادارے اےایف پی کے مطابق کمشنر برائے نسلی امتیاز ٹِم ساؤتفوماسانے نے فیئرفیکس میڈیا کو بتایا کہ اصلی فیصلے کے مطابق مسلمان خواتین سے دوسری خواتین کے مقابلے میں الگ طریقے سے پیش آیا جاتا۔ انہوں نے کہا: ’’کسی سے بھی دوسرے درجے کے شہری کے طور سلوک نہیں کیا جا سکتا، کم از کم پارلیمنٹ میں نہیں۔‘‘

ساؤتفوماسانے نے مزید کہا: ’’میں نے آج کے دِن تک کوئی ایسا تجزیہ یا رائے نہیں دیکھی جس سے یہ پتہ چلا کہ برقعے یا نقاب سے کوئی اضافی یا خصوصی سکیورٹی خطرہ لاحق ہوتا ہے۔‘‘

لیبر پارٹی کے ٹونی برک نے یہ فیصلہ واپس لیے جانے کا خیرمقدم کیا ہے۔ انہوں نے کہا کہ ایسا فیصلہ کبھی کیا ہی نہیں جانا چاہیے تھا۔ انہوں نے کہا: ’’انہیں کس بات نے ایسا سوچنے پر مجبور کیا کہ علیحدگی کا یہ خیال اچھا ہے۔‘‘

دوسری جانب محکمہ برائے پارلیمانی سروسز نے ایک بیان میں کہا ہے کہ ضوابط تبدیل کر دیے گئے ہیں، پارلیمنٹ کا دورہ کرنے والے تمام افراد کو شناخت کے لیے عارضی طور پر چہرہ دکھانا ہو گا۔

اس بیان میں مزید کہا گیا ہے: ’’اس سے سکیورٹی اسٹاف کسی بھی ایسے شخص کی شناخت کر سکے گا جس کے پارلیمنٹ میں داخلے پر پابندی ہو یا جسے سکیورٹی کے لیے خطرہ سمجھا جاتا ہو۔‘‘

محکمہ برائے پارلیمانی سروسز کے مطابق شناخت کا عمل پورا ہونے پر وزیٹرز کو پارلیمنٹ کی عمارت کے ان حصوں میں جانے کی اجازت ہو گی جو عوام کے لیے کھلے ہوں۔