بارسلونا میلہ: موبائل کی نت نئی دنیا
ہسپانوی شہر بارسلونا میں موبائل فون سے متعلقہ مصنوعات کے بین الاقوامی تجارتی میلے میں ٹیکنالوجی کی دنیا کے بڑے ادارے نت نئی مصنوعات کی نمائش کر رہے ہیں، جن میں سمارٹ فونز اور سمارٹ واچز کے ساتھ ساتھ اور بھی بہت کچھ ہے۔
سام سنگ سمارٹ فون کے نئے ماڈل
جنوبی کوریائی ادارے کے ان چوٹی کے ماڈلز کا شائقین کو بے چینی سے انتظار تھا۔ سام سنگ گلیکسی S6 اپریل سے دو مختلف ماڈلز کے ساتھ بازار میں آ رہا ہے۔ گلیکسی S6 اَیج (بائیں) کی خصوصیت یہ ہے کہ اس پر لگا شیشہ کناروں تک جا کر مُڑا ہوا ہے۔ اس کی وجہ سے نہ صرف ڈیزائن بہتر لگتا ہے بلکہ اس کے استعمال میں بھی بہتری آئی ہے۔
گھڑی بطور موبائل فون
اب تک کمپیوٹر گھڑیوں کو نبض کی رفتار ماپنے کے لیے یا جاگنگ وغیرہ کے دوران اٹھنے والے قدم شمار کرنے کے لیے استعمال کیا جاتا تھا۔ جنوبی کوریائی کمپنی LG کی تیار کردہ گھڑی Urbane LTE کے ساتھ ٹیلیفون بھی کیا جا سکتا ہے، یا تو وائرلیس وہیڈ سیٹ کے ذریعے یا پھر اس صورت میں کہ صارف کلائی پر بندھی گھڑی کی جانب منہ کر کے بولے۔ اس گھڑی میں اپنا ایک سِم کارڈ نصب ہے۔ اپنا موبائل فون آپ گھر پر چھوڑ سکتے ہیں۔
کمپیوٹر گھڑیوں کا فیشن
بارسلونا میں اور بھی ادارے اپنی سمارٹ واچز کی نمائش کر رہے ہیں۔ ہواوی کی پہلی سمارٹ واچ نبض کی رفتار ماپ سکتی ہے۔ اس میں بیرومیٹر بھی لگا ہوا ہے اور نقل و حرکت پر ردعمل ظاہر کرنے والا آلہ بھی۔ اس طرح حاصل ہونے والے ڈیٹا کو طب و صحت سے متعلقہ اَیپس کے ذریعے جانچا جا سکتا ہے۔ اس گھڑی میں بنیادی طور پر 512 میگا بائٹ ڈیٹا کی گنجائش ہے تاہم موسیقی اور دیگر ڈیٹا کے لیے چار گیگا بائٹ گنجائش رکھی گئی ہے۔
فِٹنس بینڈز، ایک نیا رجحان
بی ٹُو نامی فِٹنس بینڈ سیاہ، نقرئی اور سنہری رنگوں میں دستیاب ہے۔ اس کا ڈِسپلے ٹَچ اسکرین کی خصوصیات کا حامل ہے اور وقت بتانے کے ساتھ ساتھ نیند، کیلوریز اور طے کردہ فاصلے سے متعلق ڈیٹا بھی دکھاتا ہے۔ ہواوی کمپنی کا کہنا ہے کہ ایک بار چارج ہونے کے بعد یہ بینڈ ساتھ گھنٹوں تک موسیقی یا ریکارڈنگ سنا سکتا ہے یا پھر پانچ روز تک ڈیٹا جمع کرنے کے کام آ سکتا ہے۔
قدم قدم پر نگرانی
تائیوان کی کمپنی HTC نے کلائی پر باندھنے والا جو آلہ تیار کیا ہے، اُس میں جی پی ایس سسٹم اور دیگر حساس آلات نصب ہیں۔ اسے پہننے والا شخص ڈِسپلے پر خبریں وغیرہ بھی دیکھ سکتا ہے جبکہ یہ آلہ کھیل کُود کے دوران اُس شخص کی جسمانی فِٹنس کے بارے میں سارا ڈیٹا بھی ریکارڈ کر سکتا ہے۔ تائیوان کی اس کمپنی نے ورچوئل ریئلٹی کے مناظر دکھانے کے لیے ایک تھری ڈی یا سہ جہتی عینک Vive بھی (دائیں) متعارف کروائی ہے۔
ہمہ وقت ساتھ رہنے والا ہلکا پھلکا کیمرہ
Acumulus9 نامی کمپنی کے تیار کردہ ان ہلکے پھلکے کیمروں کے پروٹو ٹائپ بھی بارسلونا میں نمائش کے لیے پیش کیے جا رہے ہیں۔ ایک زنجیر میں باندھ کر انہیں آپ ساتھ لٹکائے پھر سکتے ہیں اور اس دوران یہ اپنے آس پاس کے مناظر کی تصاویر اور ویڈیوز بنا سکتے ہیں۔ لائیو لاگنگ موڈ میں یہ کیمرے ہر چند منٹ بعد ایک تصویر اتارتے رہتے ہیں۔