ایبولا کے باعث انٹرنیشنل پبلک ہیلتھ ایمرجنسی کا اعلان

مغربی افریقہ کے ملکوں میں ایبولا وائرس کی یہ اب تک کی سب سے بڑے پیمانے پر اور طویل ترین دورانیے کے لیے پھیلنے والی وبا ہے۔ اس کی شرح اموات پچاس فیصد ہے۔ اقوام متحدہ کے ادارے ڈبلیو ایچ او کے مطابق حالیہ وبا کے نتیجے میں اب تک کم از کم نو سو اکسٹھ افراد ہلاک ہو چکے ہیں۔ یہ وبا رواں برس مارچ میں گنی سے شروع ہوئی تھی جس کے بعد یہ سیرا لیون، لائبیریا اور نائجیریا بھی پہنچ گئی تھی۔

ڈبلیو ایچ او کی سربراہ مارگریٹ چَین نے کہا ہے کہ مغربی افریقہ سے پھوٹنے والی اس مہلک وباء پر جلد از جلد قابو پایا جائے اور اجتماعی عالمی طبی سلامتی کا انحصار اسی بات پر ہے۔ انہوں نے جمعے کو سوئٹزرلینڈ کے شہر جنیوا میں ایک پریس کانفرنس سے خطاب میں کہا: ’’ابھی تک اس سے متاثر ہونے والے ملک اس سطح کی وبا اور اس نوعیت کی پیچیدگی کا اپنے طور پر سامنا کرنے کے قابل نہیں ہیں۔ میں عالمی برادری پر زور دیتی ہوں کہ وہ ہر ممکن حد تک ہنگامی بنیادوں پر یہ معاونت مہیا کرے۔‘‘

خبر رساں ادارے اے پی کے مطابق نائجیریا نے بھی جمعے کو ایبولا وائرس کے پھیلاؤ کو قومی ایمرجنسی قرار دے دیا۔ وہاں اس وائرس کے سبب دو افراد ہلاک ہو چکے ہیں۔ نائجیریا کی وزارتِ صحت کے مطابق سات دیگر افراد کے اس وائرس میں مبتلا ہونے کی تصدیق ہو چکی ہے۔ صدر گُڈ لک جوناتھن نے اس بیماری پر قابو پانے کے لیے گیارہ ملین ڈالر سے زائد کے فنڈز کی منظوری دی ہے۔ اس کے ساتھ ہی انہوں نے کہا کہ اسکولوں کی حالیہ چھٹیاں بھی بڑھا دی جائیں تاکہ ماہرین کو ایبولا کے خطرے کا جائزہ لینے کا وقت مل سکے۔

ایبولا وائرس کے بارے میں پہلی مرتبہ 1976ء میں پتہ چلا تھا۔ تب سے وسطی اور مشرقی افریقہ میں بیس مرتبہ یہ وبا پھیلی ہے۔ تاہم مغربی افریقہ میں اس وبا کے پھیلنے کا یہ پہلا موقع ہے۔

یہ دُنیا کی خطرناک ترین بیماریوں میں سے ایک ہے۔ ایبولا وائرس چند ہی دِنوں میں اپنے شکار کی جان لے سکتا ہے۔ اس کے نتیجے میں شدید بخار، پٹھوں میں درد، ابکائیوں اور اسہال کا سامنا ہو تا ہے اور بعض حالات میں اعضاء کام کرنا چھوڑ دیتے ہیں جبکہ مسلسل خون بھی رستا ہے۔