ایبولا وبا: حفاظتی اقدامات کے باجود پھیلاؤ میں اضافہ

مغربی افریقہ کے ملک گِنی کے دارالحکومت کوناکری میں گِنی کے علاوہ سیرالیون اور لائبیریا کے درمیان ہونے والی ریسپونس میٹنگ میں عالمی ادارہٴ صحت کی سربراہ ڈاکٹر مارگریٹ چن نے بھی شرکت کی۔ اس سربراہ اجلاس میں ورلڈ ہیلتھ آرگنائزیشن کی جانب سے 100 ملین ڈالر سے ایبولا وبا کو کنٹرول کرنے کے خصوصی پلان کا اعلان کیا گیا۔ اِس خصوصی ریسپونس پلان کے تحت ایبولا وبا کے مریضوں اور بیماری کے سدِباب کے لیے سینکڑوں امدادی ورکروں کی تعیناتی بھی شامل ہے۔

کوناکری اجلاس سے خطاب کرتے ہوئے ورلڈ ہیلتھ آرگنائزیشن کی سربراہ ڈاکٹر مارگریٹ چن کا کہنا تھا کہ ایبولا بیماری کے خلاف ایک بھرپور جنگ شروع کرنے کا وقت آ گیا ہے اور اِس موقع پر ایک کوتاہی یا لغزش سے یہ کنٹرول سے باہر ہو کر اپنی گرفت میں کئی دوسرے قریبی ملکوں کو لے سکتی ہے۔ ڈاکٹر چن کا مزید کہنا ہے کہ ایبولا بیماری کی وبا کے سماجی و اقتصادی اثرات سارے براعظم پر بے پناہ ہو سکتے ہیں۔ ایبولا کے خلاف ڈبلیو ایچ او کے ریسپونس پروگرام میں امریکا کی جانب سے مالی امداد بھی شامل ہو گی۔امکان ظاہر کیا گیا ہے کہ امریکا کی جانب سے مزید امداد کا اعلان اگلے ہفتے کے دوران واشنگٹن میں ہونے والی امریکا افریقہ سمٹ کے دوران ممکن ہے۔

طبی غیر سرکاری تنظیم ڈاکٹرز وِدآؤٹ بارڈرز نے بھی عالمی ادارہ صحت سے مطالبہ کیا ہے کہ وہ ایبولا بیماری کی وبا کو ختم کرنے کے لیے انتہائی اہم اور ضروری فیصلے فوری طور پر کرے کیوں کہ تاخیر سے صورت حال خراب سے خراب تر ہو جائے گی۔ اِس تنظیم کے 550 امدادی ورکرز متاثرہ علاقوں میں طبی سرگرمیاں جاری رکھے ہوئے ہیں۔ ڈاکٹرز وِدآؤٹ بارڈرز کے بیان میں کہا گیا کہ سیرالیون میں اُس کے پاس بے شمار مریض پہنچے ہیں جب کہ لائبیریا کو طبی امداد کی اشد ضرورت ہے۔ اِس بیان میں مزید بتایا گیا کہ گزشتہ ہفتوں کے دوران اِس وبا میں واضح اضافہ دیکھا گیا ہے اور سیرالیون اور لائبیریا میں ایبولا کے متاثرہ مریضوں کی تعداد میں غیر معمولی اضافہ ہوا ہے۔ ڈاکٹرز وِدآؤٹ بارڈرز کے مطابق گنی میں چند ایام کے وقفے کے بعد گزشتہ ہفتے کے دوران مزید ہلاکتوں کے علاوہ ایبولا سے متاثرہ مریض خصوصی طبی مراکز لائے گئے ہیں۔

رواں برس مارچ میں ایبولا بیماری کا پہلا مریض سامنے آیا تھا۔ اب تک اِس بیماری کی لپیٹ میں رپورٹ کیے گئے مریضوں کی تعداد 1323 ہے۔ اِن میں سے ستر فیصد کی ہلاکت ہو چکی ہے۔ ہلاکتوں کی تعداد 739 ہے۔ سب سے زیادہ متاثر ممالک گنی، لائبیریا اور سیرالیون کے ہیں۔ گنی میں ایبولا سے ہلاک ہونے والوں کی تعداد 339 ہے۔ سیرالیون میں 233 اور لائبریا میں 156 اِس وبا سے ہلاک ہوئے ہیں۔ ایک اور افریقی ملک نائجیریا میں ایک مریض کی ہلاکت کا بتایا گیا ہے۔ دو امریکی امدادی ورکرز بھی ایبولا کی لپیٹ میں آ گئے ہیں۔ اِن کو انہی دنوں میں امریکا منتقل کیا جا رہا ہے۔