اوباما کا ایسٹونیا کا دورہ

امریکی صدر باراک اوباما کے ایسٹونیا کے دورے کی علامتی حیثیت ایک جانب تاہم ماہرین کا خیال ہے کہ اس دوران تالن حکومت اوباما سے ملک میں نیٹو کی موجودگی میں اضافہ کرنے کی درخواست کر سکتی ہے۔ ان کے اس مطالبے پر کس حد تک عمل کیا جا سکتا ہے؟

امریکی صدر باراک اوباما کل بدھ تین ستمبر کو ایسٹونیا پہنچ رہے ہیں۔ مشرقی یوکرائن میں جاری بحران کے تناظر میں اوباما کے اس دورے کو ایسٹونیا سمیت دیگر بالٹک ریاستوں کے لیے امریکا اور نیٹو کی جانب سے تعاون کی یقین دہانی کے طور پر دیکھا جا رہا ہے۔ اس کے ساتھ ہی وہ روسی صدر ولادی میر پوٹن کو واضح طور پر یہ پیغام بھی دینا چاہتے ہیں کہ وہ اِن ممالک میں دخل اندازی کا خیال بھی ذہن سے نکال دیں۔ اس دوران یورپ میں سلامتی کی موجودہ صورتحال کو دیکھتے ہوئے اوباما نیٹو کے دیگر رکن ممالک کی توجہ خصوصی طور پر ایسٹونیا کی جانب مبذول کرانے کی کوشش کریں گے۔اوباما نیٹوکے منصوبوں میں ایسٹونیا کے کردار کو اس اتحاد کے لیے ایک مثال کے طور پر دیکھتے ہیں۔

ابھی ایک ہفتے قبل ہی یوکرائن کی فوج نے ملک کے مشرقی حصے میں اسلحہ و بارودکی ایک بڑی تعداد قبضے میں لی ہے۔ بتایا جاتا ہے کہ یہ وہ عسکری ساز و سامان ہے، جو روسی افواج کے استعمال میں ہے۔ اس دوران حاصل ہونے والے دستاویزات سے واضح ہوتا ہے کہ یہ اسلحہ روس نواز باغیوں کے نہیں بلکہ وہاں موجود روسی افواج کے استعمال میں تھا۔ روسی افواج نے ان خبروں کو بے بنیاد قرار دیا ہے۔ اس کے علاوہ بھی کئی ایسے واقعات سامنے آئے ہیں، جن میں کییف حکام نے ماسکو حکومت پر مداخلت کا الزام عائد کیا ہے۔ ماہرین کے خیال میں یوکرائن میں سامنے آنے والے ان واقعات کے بعد ایسٹونیا، لیٹویا، لتھوانیا اور پولینڈ کی حکومتوں کا فکر مند ہونا قابل فہم ہے۔ صورتحال کو بھانپتے ہوئے مغربی دفاعی اتحاد نیٹو نے موسم بہار میں ہونے والے اپنے اجلاس میں مشرقی یورپی ارکان پر خصوصی توجہ دینے اور ان ممالک میں نیٹو افواج کی موجودگی کو بڑھانے کا فیصلہ کیا تھا۔ امید ہے کہ اس ہفتے ویلز میں ہونے والے اجلاس میں نیٹو رہنما اس حوالے سے ایک مفصل پیکج کی منظوری دیں گے۔

تاہم اس سلسلے میں معاملات اُس وقت کچھ پیچیدہ ہو گئے، جب اگست کے وسط میں جرمن چانسلر انگیلا میرکل نے لیٹویا کے دورے کے موقع پر خطے میں نیٹو کے جنگجو دستوں کی مستقل موجودگی کے فیصلے کو ناقابل عمل قرار دے دیا تھا۔ نیٹو سربراہی اجلاس سے قبل مغربی دفاعی اتحاد کے سیکرٹری جنرل آندرس فوگ راسموسن اور ایسٹونیا کے سیاستدانوں نے کہا ہے کہ وہ کسی ایسے پیکج کے حوالے سے پر امید ہیں۔ ماہرین کے مطابق اوباما کے دورہ تالن کو اسی وقت نتیجہ خیز قرار دیا جا سکتا ہے، جب وہ تعاون کی یقین دہانیوں کے حوالے سے ایسٹونیا کی توقعات کوحقیقت کے روپ میں ڈھالنے میں کامیاب ہو جائیں گے۔