انڈونیشیا میں فوج سویلین معاملات میں اپنا اثر بڑھاتی ہوئی

انڈونیشیا میں کئی دہائیوں تک برسراقتدار رہنے والے فوجی آمر سُہارتو کے بعد ملک میں جمہوری اقدار نے فروغ پایا تھا۔ تاہم گزشتہ برس برسراقتدار آنے والے صدر جوکو وِدودو کے دور میں ایک مرتبہ پھر فوج سویلین معمولاتِ زندگی میں اپنا کردار مسلسل بڑھا رہی ہے۔

پالیسی انالیسٹ آف کانفلِکٹ (IPAC) نامی تھنک ٹھینک نے اپنی رپورٹ میں بتایا ہے کہ فوج ملکی سویلین اداروں پر اپنی گرفت مسلسل مضبوط کر رہی ہے۔

رپورٹ میں خبردار کیا گیا ہے، ’’جتنا لمبا عرصہ یہ ایسی سرگرمیوں میں مصروف رہے گی، اتنا ہی گہرا سیاسی اثر پیدا ہو گا اور پھر انہیں ان اداروں سے الگ کرنا اتنا ہی دشوار بھی ہو گا، خصوصاﹰ انہیں سویلین قوانین اور مقدمات سے استثناء دے کر ریاستی اداروں میں داخل کرنا۔‘

اس رپورٹ کے مطابق انڈونیشیا میں مسلح افواج نے متعدد وزارتوں کے ساتھ معاہدے کر کے رفتہ رفتہ یہ اجازت حاصل کر لی ہے کہ وہ کھادوں کی تقسیم، جیلوں کی حفاظت اور عوامی و ریاستی بنیادی ڈھانچے کے قیام جیسے منصوبوں میں شامل ہو جائیں۔

رواں ماہ ملکی فوج نے انسداد منشیات کی قومی ایجنسی کے ساتھ ایک یادداشت پر اتفاق کر لیا ہے، جس کے تحت صدر وِدودو کی حمایت یافتہ ایک انسداد منشیات کی مہم میں فوج شامل ہو گی۔ صدر وِدودو نے منشیات کے خلاف ملکی جنگ کا اعلان کر رکھا ہے اور اس سے متعلقہ جرائم میں ملوث ملکی و غیرملکی افراد کو دی جانے والی موت کی سزاؤں پر عمل درآمد ہو رہا ہے۔

تھنک ٹینک کی اس رپورٹ میں کہا گیا ہے کہ کرپشن اور غیرمقبول پولیس فورس سمیت متعدد تنازعات میں گھرے صدر کی کمزوریوں کا فائدہ اٹھاتے ہوئے رفتہ رفتہ سویلین اداروں میں اپنی جڑیں مضبوط کر رہی ہے۔

انڈونیشیا میں شہری اداروں میں فوجی اثرورسوخ میں اضافے پر انسانی حقوق کی تنظیموں کی جانب سے بھی مسلسل تشویش کا اظہار کیا جا رہا ہے۔ انسانی حقوق کی تنظیم العارف کا کہنا ہے کہ صدر پارلیمان میں کم حمایت کے تناظر میں غالباﹰ فوج کی حمایت حاصل کرنے کے لیے اس معاملے سے چشم پوشی اختیار کیے ہوئے ہیں۔

اس تنظیم کے مطابق، ’’ہمیں خوف ہے کہ ماضی کی طرف تشدد اور انسانی حقوق کی خلاف ورزیوں کا سلسلہ پھر شروع ہو سکتا ہے۔‘‘

خیال رہے کہ فوجی آمر سُہارتو کے کئی دہائیوں پر محیط دورِ حکومت میں ملکی مسلح افواج انسانی حقوق کی خلاف ورزیوں میں ملوث رہیں۔ سن 1998ء میں سہارتو کی حکومت کے خاتمے کے بعد فوج کو سویلین اداروں سے الگ کیا گیا اور ملک میں جمہوری اقدار کی بنیاد پڑی۔

اس کے بعد حاضر سروس فوجیوں کی بطور صوبائی گورنر، ارکان پارلیمان اور ارکان کابینہ تقرریوں پر بند باندھے گئے اور فوج کے کردار کو ملکی دفاع تک محدود کیا گیا۔