انسان 10 کھرب خوشبوئیں شناخت کر سکتا ہے

کئی دہائیوں تک سائنسدان سمجھتے رہے ہیں کہ انسان محض 10 ہزار مختلف خوشبوؤں کو پہچان سکتا ہے جس کی وجہ سے سونگھنے کی حِس کو دیکھنے اور سننے کی حس کے بعد کا درجہ دیا جاتا تھا۔

امریکہ کی راک فیلر یونیورسٹی کی ’لیبارٹری آف نیوروجینیٹکس اینڈ بیہیویور‘ کی سربراہ اور اس تحقیق کی شریک مصنفہ لیزلی ووشیل کے مطابق، ’’ہمارا تجزیہ یہ ثابت کرتا ہے کہ انسانوں میں خوشبوؤں میں امتیاز کرنے کی صلاحیت اس سے کہیں زیادہ ہے جتنی پہلے سمجھی جاتی رہی ہے۔‘‘

اس سے قبل ناک کی سونگھنے کی صلاحیت کا اندازہ 1920ء میں لگایا گیا تھا تاہم اس کی درستگی کے حوالے سے کوئی ڈیٹا موجود نہیں تھا۔ ناک میں سونگھنے کی صلاحیت رکھنے والے 400 حساسیے یا ریسپٹرز موجود ہوتے ہیں۔

محققین کے مطابق انسانی آنکھ اور اس کے محض تین ریسپٹرز کئی ملین رنگوں میں تمیز کرنے کی صلاحیت رکھتے ہیں جبکہ انسانی کان 340,000 مختلف آوازیں سننے کے قابل ہوتے ہیں۔ ووشیل کے مطابق، ’’سونگھنے کی صلاحیت جانچنے کا کسی کو وقت ہی نہ ملا۔‘‘

اپنی تحقیق کے لیے سائنسدانوں نے 26 مختلف افراد کو بُو باس رکھنے والے 128 مالیکیولز کے باہمی ملاوٹ سے بننے والی مختلف خوشبوئیں سنگھائیں۔ تاہم ان مالیکیولز کو زیادہ سے زیادہ 30 کے گروپ میں مکس کیا گیا۔

ووشیل کے مطابق، ’’ہم یہ نہیں چاہتے تھے کہ آسانی سے پہچانی جانے والی بو ترتیب پائے، لہٰذا ہمارے تیار کردہ زیادہ تر مکسچرز بہت ہی ناگوار اور پراسرار تھے۔‘‘

تحقیق میں شریک رضاکاروں کو ایک وقت میں تین مختلف smells سونگھنے کے لیے دی گئیں۔ ان میں سے دو ایسی تھیں جو وہ پہلے بھی سونگھ چکے تھے جبکہ تیسری مختلف تھی اور انہیں یہ بتانا تھا کہ کونسی smell یا بو مختلف ہے۔ اس حوالے سے 264 مختلف موازنے مکمل کرائے گئے۔

تحقیق میں شامل رضاکاروں کی خوشبوؤں میں تمیز کرنے کی صلاحیت کافی حد تک مختلف تھی تاہم یہ اوسطاﹰ 51 فیصد سیمپلز کا درست پتہ لگانے میں کامیاب رہے۔

اس طرح ان ریسرچرز نے اندازہ لگایا کہ اگر تحقیق میں شامل تمام 128 مختلف smells کے امتزاج بنائے جائیں تو اس کی کُل تعداد ایک ٹریلین یعنی 10 کھرب تک جا پہنچے گی۔

راک فیلر یونیورسٹی سے ہی تعلق رکھنے والے اس تحقیق کی سربراہ آندریاز کیلر کے مطابق ہمارے آباء واجداد سونگھنے کی صلاحیت پر بہت زیادہ بھروسہ کرتے تھے تاہم ریفریجریشن اور ذاتی صفائی کے معاملات پر بہت زیادہ توجہ کے باعث جدید دنیا میں انسانوں کی مختلف smells سونگھنے کے مواقع محدود ہو گئے ہیں۔ اس ریسرچ کے نتائج تحقیقی جریدے نیچر میں شائع ہوئے ہیں۔