انبار میں جہادیوں کے خلاف کارروائی شروع

خبر رساں ادارے روئٹرز نے بتایا ہے کہ عراقی فورسز نے رمادی کو تین اطراف سے محاصرے میں لے لیا ہے جبکہ شیعہ فائٹرز نے صوبہ انبار میں جہادیوں کے خلاف کارروائی شروع کر دی ہے۔ ان جہادیوں نے گزشتہ جمعرات کو عراقی فورسز کو پسپا کرتے ہوئے اس اہم شہر پر قبضہ کر لیا تھا۔

الحشد الشعبی نامی شیعہ جنگجوؤں کے گروہ نے بتایا ہے کہ ابتدائی طور پر صلاح الدین صوبے کے شمالی علاقوں میں پش قدمی کی جا رہی ہے تاکہ جہادیوں کے لیے سپلائی لائن کو توڑ دیا جائے۔

ادھر عراقی حکام نے دعویٰ کیا ہے کہ جہادیوں کے خلاف شروع کی گئی تازہ کارروائی میں گزشتہ کچھ دنوں کے دوران رمادی کے جنوب میں کامیابیاں حاصل کر لی گئی ہیں۔

یہ امر اہم ہے کہ عراقی صوبے انبار میں زیادہ آبادی سنی مسلمانوں کی ہے اور یوں رمادی کو بازیاب کرانے کے لیے شروع کیے گئے اس فوجی مشن میں شیعہ جنگجوؤں پر زیادہ بھروسہ کرنے سے فرقہ واریت کو ہوا مل سکتی ہے۔

امریکی حکام نے اس حوالے سے تحفظات کا اظہار کرتے ہوئے منگل کے دن خبردار کیا ہے کہ عراق کے شعیہ وزیر اعظم حیدر العبادی کو اس حوالے سے محتاط رہنے کی ضرورت ہے۔ واشنگٹن حکومت نے یہ بھی کہا ہے کہ اس کے نزدیک جہادیوں کے خلاف حقیقی کارروائی ابھی شروع نہیں ہوئی ہے اور اس کے لیے عراق کی فورسز سمیت سنی اور شیعہ تمام گروہوں کو ساتھ ملانے کی ضرورت ہے۔

پینٹا گون کی طرف جاری کیے گئے ایک بیان کے مطابق جہادیوں کے خلاف شروع کیے گئے فوجی آپریشن کا نام متنازعہ ثابت ہو سکتا کیونکہ سنی کمیونٹی میں اس کے خلاف جذبات ابھر سکتے ہیں۔

یہ امر اہم ہے کہ الحشد الشعبی کی طرف سے شروع کی گئی فوجی مہم کا نام ’لبیک یا حسین‘ رکھا گیا ہے۔ ایران نواز ان شیعہ جنگجوؤں نے کہا ہے کہ یہ آپریشن زیادہ طویل ثابت نہیں ہوگا اور ’دشمن‘ ان کے ہتھیار دیکھ کر پریشان ہو جائے گا۔