اسلام آباد میں رقص و موسیقی کے رنگ

جہاں اس میلے کے اسٹیج سے گلوکاروں اور موسیقاروں نے اپنے فن کا مظاہرہ کیا، وہاں اس طرح کی لائیو پرفارمنس نے بھی لوگوں پر سحر طاری کر دیا۔ ایک خاتون فنکارہ آگ کے شعلے اگلتے ہوئے حاضرین کو دم بخود کر رہی ہے۔

میلے میں صوفی بینڈ پپو سائیں کے فنکار ڈھول کی تھاپ پر روایتی رقص کر رہے ہیں۔ اس میلے کے ذریعے ایک طرح سے فنکاروں نے خود یہ بڑا اٹھایا ہے کہ موسیقی کی صنعت کو درپیش مسائل کا مل بیٹھ کر جائزہ لیا جائے اور موسیقی کو ایک مکمل صنعت کا درجہ دلوانے کے لیے کوششیں کی جائیں۔

پاکستان علاقے چولستان سے تعلق رکھنے والے کرشن لال بھیل نے بھی میلے میں اپنے مخصوص سُر بکھیرے۔ اسلام آباد کے بہت سے باسیوں کے لیے اس طرح کے شاندار اور منظم اجتماع کا اہتمام ایک خوش کُن لیکن غیر متوقع بات تھی۔

چولستان کے فنکار کرشن لال بھیل کے گیتوں کے ساتھ ساتھ اُس علاقے کی فنکار خواتین مقامی رقص بھی پیش کرتی رہیں۔ توقع کی جا رہی ہے کہ وقت کے ساتھ ساتھ اسلام آباد کے اس میلے کو ایک مستقل مقام مل جائے گا۔

میلے کی دوسری شام ایک فنکار بین بجاتے ہوئے حاضرین سے داد سمیٹ رہا ہے۔ اب اس طرح کے میلے پاکستان کے دیگر بہت سے چھوٹے بڑے شہروں میں بھی سجانے کا سوچا جا رہا ہے۔

مشہور پنجابی فوک گلوکار فضل جٹ نے بھی ایک شام اس میلے میں اپنے فن کا مظاہرہ کیا اور خوب داد سمیٹی۔ اس میلے کا ایک مقصد موسیقی کی وساطت سے لوگوں کو ایک دوسرے کے قریب لانا تھا۔

گلوکار شہر یار مرزا نے اپنے انگریزی گیت کے ذریعے حاظرین کے دل موہ لیے۔ اس میلے کے دوران لوگوں کو دعوت ناموں کے ذریعے مدعو کیا گیا تھا۔

اگرچہ معروف فنکار اریب اظہر نے اس میلے کے دوران اپنے فن کا جادو بھی جگایا تاہم وہ ساتھ ساتھ اس میلے کے منتظمین میں بھی شامل تھے۔ اس اجتماع سے محظوظ ہونے والوں میں بڑی تعداد میں غیر ملکی بھی شامل تھے۔

میلے کی ایک شام اسلام آباد میں واقع امریکی سفارت خانے کا ایک نمائندہ شائقین کا شکریہ ادا کر رہا ہے کہ وہ اتنی بڑی تعداد میں اس اجتماع میں شرکت کے لیے آئے۔ یہ پہلا موقع نہیں ہے کہ امریکی سفارت خانہ اس طرح کے کسی موسیقی کے میلے میں تعاون کر رہا ہے۔

میلے میں شمالی وزیرستان سے تعلق رکھنے والے ممتاز پشتون گلوکار شان خان نے بھی اپنی آواز کا جادو جگایا اور کئی ایک منفرد پشتو نغمات گا کر سنائے۔ میلے کے حاضرین میں بڑی تعداد مقامی طلبہ و طالبات کی تھی۔

فنکاروں کو اسٹیج پر آنے کی دعوت دینے والے تھے، معروف اینکر پرسن اور ایک مارننگ شو کی میزبان فرح اور اُن کا ساتھ دے رہے تھے ، عمر خالد بٹ۔ اس میلے نے جدید، لوک اور صوفی موسیقی سے تعلق رکھنے والے مختلف فنکاروں کو مل بیٹھنے اور موسیقی کے موضوع پر بات چیت کرنے کا بھی موقع فراہم کیا۔

نوجوان شائقین کی ایک بڑی تعداد نے اس میلے سے لطف اٹھایا۔ کئی نوجوانوں کا کہنا تھا کہ اس طرح کے بھرپور ثقافتی اجتماع میں شرکت اُنہیں بالکل ایک خواب کی طرح لگ رہی ہے کیونکہ عام طور پر اس طرح کے کنسرٹ کراچی یا پھر لاہور میں منعقد کیے جاتے ہیں، نہ کہ اسلام آباد میں۔

اس میلے میں اسلام آباد کے ایک فنکار شمعون اسماعیل نے بھی شائقین کے ایک بڑے ہجوم کے سامنے اپنے فن کا مظاہرہ کیا۔ اس میلے کا اہتمام پاکستان نیشنل کونسل آف دی آرٹس (PNCA) میں کیا گیا تھا۔

قبائلی علاقے وزیرستان کے ایک فنکار مسعود کمال اسلام آباد میلے میں اپنے فن کا مظاہرہ کر رہے ہیں۔ اس سہ روزہ میلے کا اہتمام فاؤنڈیشن فار آرٹس کلچر اینڈ ایجوکیشن (FACE) نے پاک امریکا تنظیم (PUAN) کے ساتھ مل کر کیا۔

سترہ سے لے کر اُنیس اپریل تک میلے کے تینوں دنوں میں شائقین کی ایک بڑی تعداد ملک کے چوٹی کے فنکاروں کو دیکھنے اور سننے کے لیے پاکستان نیشنل کونسل آف دی آرٹس میں جمع ہوتی رہی۔