ادب و ثقافت کی دنیا، مختصر مختصر

’آئرن مَین‘: سال میں 75 ملین ڈالر آمدنی

ہالی وُڈ میں ’آئرن مَین‘ اور ’دی اوینجرز‘ جیسی فلموں میں ہیرو کے کردار ادا کرنے والے اُنچاس سالہ اداکار رابرٹ ڈاؤنی جونیئر کو مسلسل دوسرے برس ہالی وُڈ کا سب سے زیادہ معاوضہ لینے والا اداکار قرار دیا گیا ہے۔ ’فوربس‘ میگزین کے اندازوں کے مطابق جون 2013ء سے لے کر جون 2014ء تک کے عرصے کے دوران اس اداکار کی آمدنی 75 ملین ڈالر ریکارڈ کی گئی۔

چھ عشروں پر محیط فنّی کیریئر

ہالی وُڈ کے ڈرامہ اور ایکشن فلموں کے نامور اداکار جیمز گارنر حال ہی میں چھیاسی برس کی عمر میں لاس اینجلس میں انتقال کر گئے۔ وہ اپنے چھ عشروں پر پھیلے ہوئے کیریئر کے دوران فلم کے ساتھ ساتھ ٹیلی وژن کے شعبے میں بھی سرگرمِ عمل رہے اور اُن کی ٹی وی سیریز ’میورِک‘ اور ’ڈی ٹیکٹیو راک فورڈ‘ کو بالخصوص زبردست پذیرائی ملی۔

ناقدین کو نظر انداز کروں گا، فواد خان

آج کل بھارتی فلم نگری ممبئی میں ہدایتکار ششانک گھوش کی فلم ’خوبصورت‘ کی شوٹنگ میں مصروف پاکستانی اداکار فواد افضل خان کو کسی ہندی فلم میں کام کرنے کی بناء پر پاکستانی سوشل میڈیا میں تنقید کا سامنا کرنا پڑ رہا ہے۔ اُن کے مدمقابل سونم کپور ہیروئن کا کردار ادا کر رہی ہیں اور یہ فلم اس سال ستمبر میں ریلیز ہو گی۔ ’خدا کے لیے‘ جیسی فلموں اور ’زندگی گلزار ہے‘ جیسی ٹی وی سیریلز سے شہرت پانے والے اس اداکار نے ممبئی میں صحافیوں سے باتیں کرتے ہوئے کہا کہ تنقید کرنے والے تعداد میں زیادہ نہیں ہے اور وہ ایسے ناقدین کو نظر انداز کرنا ہی پسند کریں گے۔

آرٹ کے شعبے کے ’نوبل‘ انعامات

جاپان کے شاہی خاندان کی سرپرستی میں جاپان آرٹ ایسوسی ایشن کی جانب سے ہر سال دیے جانے والے ’پریمیم امپیریالے‘ انعامات کو نوبل پرائز کے ہم پلّہ قرار دیا جاتا ہے اور یہ انعامات فنون لطیفہ کے پانچ شعبوں مصوری، مجسمہ سازی، فن تعمیر، موسیقی اور تھیئٹر یا فلم کے لیے دیے جاتے ہیں۔ حال ہی میں اس سال کے ’پریمیم امپیریالے‘ کا اعلان برلن اور دنیا کے پانچ دیگر شہروں میں بیک وقت کیا گیا۔ ان میں سے ہر انعام کی مالیت ایک لاکھ پندرہ ہزار یورو کے برابر ہوتی ہے۔ 2014ء کے لیے ایستونیا کے اٹھہتر سالہ کمپوزر آروو پَیرٹ، افریقی ڈرامہ نگار ایتھل فیوگاد، فرانسیسی مصور مارسیال رائس، اطالوی مجسمہ ساز جیزیپے پینونے اور امریکی ماہرِ تعمیرات اسٹیون ہال کو یہ انعامات دینے کا اعلان کیا گیا ہے۔ ان انعامات کی تقریب تقسیم پندرہ اکتوبر کو جاپانی دارالحکومت ٹوکیو میں ہو گی۔

جرمنی میں بالی وُڈ میلہ

جرمن شہر اشٹٹ گارٹ میں منعقد ہونے والا اپنی نوعیت کا گیارہواں انڈین فلمی میلہ بیس جولائی کو اپنے اختتام کو پہنچ گیا۔ اس پانچ روزہ میلے کے دوران بالی وُڈ سے آئی ہوئی چالیس سے زائد فلمیں دکھائی گئیں۔ اس میلے کا افتتاح سولہ جولائی کو فلم ’سدھارتھ‘ کی نمائش سے ہوا تھا، جو اچانک لاپتہ ہو جانے والے ایک لڑکے کے بارے میں ہے۔ میلے کے اختتام پر اسی فلم کو ’جرمن سٹار آف انڈیا‘ ایوارڈ سے نوازا گیا۔ میلے کے مقابلے کے مختلف شعبوں میں سات ہزار یورو مالیت کے انعامات دیے گئے۔

سیاہ فاموں کے حقوق کے لیے سرگرم سفید فام ادیبہ

دنیا بھر کے ادبی و سماجی حلقے جنوبی افریقہ کی نامور ادیبہ نادین گورڈیمر کو خراجِ عقیدت پیش کر رہے ہیں۔ وہ پیر چَودہ جولائی کو نوّے برس کی عمر میں انتقال کر گئی تھیں۔ اپنی ادبی تخلیقات میں نسلی امتیاز کے متنازعہ نظام کو موضوع بنانے والی اس ادیبہ کو 1991ء میں ادب کے نوبل انعام سے نوازا گیا تھا۔ وہ 1923ء میں مشرقی یورپ سے نقل مکانی کر کے جنوبی افریقہ میں جا کر آباد ہو جانے والے ایک یہودی خاندان میں پیدا ہوئی تھیں۔