Шерпасите тврдат дека годинава нема да се качуваат на Монт Еверест

„Имавме долг состанок и одлучивме да го запреме искачувањето оваа година во чест на нашите браќа. Сите шерпаси се обединети во оваа одлука“, рече локалниот водач Тулси Гурунг, чиј брат е еден од загинатите шерпаси. Тој додава дека „некои од водичите веќе заминаа, а на други ќе им треба една недела додека да спакуваат сѐ и да заминат“.

И друг шерпас во базниот камп, како и американски алпинист ја потврдуваат оваа информација за агенцијата АФП. Водичот Пасанг Шерпа вели: „Шеснаесет луѓе загинаа на оваа планина на првиот ден од нашето искачување. Како можеме да стапнеме таму?“ Американскиот алпинист Ед Марцек, пак, рече дека шерпасите „чувствуваат дека треба да го затворат Еверест оваа година како сеќавање на оние кои загинаа“. Одлуката дојде четири дена по лавината во која животот го загубија 13 шерпаси, а тројца други се водат како исчезнати. „Тие сакаат следниот месец да организираат протест во Катманду и велат дека не можат да го направат ако се на планината“, додава американскиот алпинист.

Намерата на шерпасите да се повлечат од оваа алпинистичка сезона ги погодува плановите на стотина странски алпинисти. Многумина од нив се веќе во базниот камп, откако претходно платиле илјадници долари за да се искачат на највисокиот врв во светот. Шерпасите се значајни во исполнувањето на таквата намера, бидејќи тие носат опрема, храна, ги поправаат јажињата и ги намалуваат ризиците за нивните клиенти.

Шерпасите претходно ѝ се заканија на владата дека ќе го откажат искачувањето на Монт Еверест и ѝ поставија ултиматум до следниот понеделник, барајќи повисок надомест, договор за ретроактивна исплата на осигурување и фонд за социјална помош.

Владата се согласи денеска да направи фонд за помош наменет за повредени шерпаси или семејства на загинати водачи во алпинистички несреќи. По последната несреќа владата во Непал информираше дека ќе исплати им исплати на семејствата по 415 долари за секој загинат шерпас. Шерпасите сметаат дека заслужуваат повеќе.