Уставниот суд го аминуваше бркањето новинари
17 април 2014Уставниот суд оцени дека отстранувањето на новинарите од Собранието на 24-ти декември 2012 година било поради нивна заштита. Со ваквата одлука, судот ги одби двете барања за заштита на слободите и правата поднесени од шест новинари и од Здружението на новинари на Македонија. Судот проценил дека физичкото отстранување на новинарите од галеријата настанало поради конкретна ситуација на ескалација на хаос и безредие, а целта била да се заштитат новинарите и да се обезбеди ред во салата. Барањето на ЗНМ, судот го одбил од процедурални причини, затоа што подносител може да биде само физичко лице.
Претседателот на Здружението на новинари на Македонија, Насер Селмани, за телевизијата Нова изјави дека тие ќе поведат постапка пред Судот за човекови права во Стразбур откако Уставниот суд ги одби двете барања за заштита на слободите и правата поднесени од шест новинари и од ЗНМ поради насилното отстранување на новинарите од собраниската сала на 24 декември 2012. Селмани вели дека засега ќе се воздржи од коментари за самата пресуда бидејќи се‘ уште ја немаат добиено истата.