Противниците на штедењето-нови кормилари во Грција

Министерството за финансии го презема професорот по економија и публицист Јанис Варуфакис. Економистот, школуван во Велика Британија и во САД, се смета за остар критичар на политиката на штедење, протежирана првенствено од Германија, и пледира за отпис на долговите, како и за нова ориентација на европската кризна политика. Економските тези на Варуфакис во форма на статии и книги достигнуваат огромни тиражи во Грција. Во својата најнова книга „Глобалниот Минотаурус. Америка и иднинатана светската економија“, економистот ги прогласува спасувачките мерки во рамките на евро-кризата за пропаднати, инсистирајќи на „историски одлуки“ преку кои во преден план би бил ставен економскиот пораст, на пример преку заедничка европска инвестициска програма. Варуфакис се смета за ратоборен економист, кој по правило сепак, за разлика од многумина политичари на левичарската партија Сириза, не користи идеолошка, туку објективна и конкретна аргументација.

Во умерените гласови во леввоориентираната партија се вбројува министерот за економија Јоргос Статакис, кого во сопствените редови го сметаат за лев социјалдемократ. Нему, како и на Варуфакис му стои од страна еден „вардач“: Јанис Драгасакис, економист школуван во Лондон на Лондонскиот факултет за економски и политички науки и досегашен заменик-претседател на грчкиот парламент, длабоко почитуван како од пријателите, така и од непријателите. Како заменик-премиер тој во Атина ќе има надзор над целокупната област на економијата и финансиите. Освен тоа, 67-годишникот планира формирање „национална комисија за преговори“ која треба да дискутира околу новото регулирање на грчките долгови. „Варуфакис можеби изгледа малку избувлив, но околу важните економски мерки веројатно Драгакис ќе го има последниот збор“, објаснува политичкиот аналитичар Ставрос Лугерос во програма на државната телевизија.

Концесии кон левото крило на партијата

Марксистички ориентираните економски експерти како досегашниот главен економист на левичарската партија, Јанис Милиос, при формирањето на владата останаа настрана. Но, затоа се ангажирани бројни проминентни акадамичари. Но, премиерот Алексис Ципрас не сака целосно да го запостави ни левото крило на својата партија: Панајотис Лафацанис, клучна фигурна на внатрепартиската лева опозиција, го презема клучниот ресор за „продуктивна обнова“ на Грција. Со тоа тој добива и право на соодлучување при важни инвестициски проекти, на пример во енергетската област. Дали Лафацанис ќе се држи до предизборните ветувања на партијата за анулирање на веќе извршените приватизации, останува да се види. Уште во ноќта на изборната победа тој пред новинарите изјави дека новата влада ќе ја реализира својата економска програма „во цел обем“.

„Ме вознемирува фактот што некои од денешните владини политичари во минатите години се истакнаа како луѓе кои ги блокираа реформите“, констатира политичкиот аналитичар Алексис Папахелас за ТВ Скај.

„Освен тоа, во оваа влада јас гледам различни струења и многу силни личности, па се прашувам дали е тоа можно да се усогласи“, скептичен е експертот. Кабинетот на Алексис Ципрас има вкупно 13 министри, 21 заменици министри и пет државни секретари. Прашање е на лично гледање дали со тоа Ципрас го исполнува за грчки прилики радикалното изборно ветување за формирање мала и ефикасна влада: ако се поаѓа од бројот на членови во кабинетот, ветувањето е исполнето. Но, тоа не менува ништо во фактот што и натаму на масата во владата седат до 40 лица.

Активна надворешна политика

Уште денеска, 28.01.2015 треба да се одржи првата владина седница. Плитичкиот новинар Павлос Цимас смета дека владата е на добар пат. Како недостаток тој сепак го гледа немањето доволно владејачко искуство: „Ниеден министер нема искуство на владини позиции, со исклучок на вицепремиерот Драгакис, кој помина четири месеци во преодната влада на Ксенофен Цолотас во 80-те години и министерот за одбрана Каменос кој еднаш беше заменикминистер за бродска трговија и тоа само девет месеци. Тоа е се‘.“

Посебно спорен е новиот министер за одбрана. Бидејќи Сириза на куриозен начин се впушти во коалиција со деснопопулистичката партија „Независни Грци“, нејзиниот шеф Панос Каменос го побара ресорот одбрана и го доби. Во минатото Каменос застапувашеисклучително патриотски позиции во надворешната политика, на пример во грко-турските односи.

Сега тој сепак ќе стои во сенката на новот министер за надворешни работи - Никос Коцијас, непартиски професор и остар аналитичар. Неговата политичка социјализација тој ја почна како член на Комунистичката партија на Грција и долги години беше близок соработник и советник на поранешниот премиер Јоргос Папандреу. По полагањето заклетва, Коцијас најави „активна надворешна политика“. Знак за тоа беше даден синоќа, откако шефовитена држави или влади на ЕУ се заканија со построги санкции против Русија поради украинската криза. Димитрис Цанакопулос, шеф на кабинетот на премиерот, изјави дека ова соопштение на ЕУ-не е договорено со Грција.