Назад кон филтер-кафе

Филтер-кафе - тоа потсетува на здодевните големи канцеларии и мемлив мирис од 50-тите години.Но, од неодамна, стариот метод на варење е повторно во мода, како во кафулето „Кофи генг“ во Келн, каде многумина одново го откриваат филтер-кафето. Бавното варење е повторно во тренд.

„Кај филтер-кафето, посебно кај ова, се чувствуваат многу различни ароми, овошни ноти. Но, независно дали ви е тоа познато или не, тоа се чувствува - така беше првиот пат и тоа веднаш ме воодушеви“, вели еден гостин.

Аманда Гацемајер и Макс Буркел досега биле поборници за еспресо и кафе за носење. Сега сакаат првпат да пробаат филтер-кафе.

„За филтер-кафето се слуша постојано дека е некако тенко, како заматена вода. Ме интересира дали е навистина така или се променило“, вели Аманда.

„Искрено, немам претстава, ќе видиме какво ќе биде“, објаснува Макс.

Филтер-кафе може да изненади, вели првиот германски кафе-сомелие, Михаел Глис:

„Во меѓувреме има над илјада откриени ароми на кафе и нив ги наоѓам во филтер-кафето. Во еспресото ги нема толку. Сакам еспресо, но филтер-кафето ми дава можност со секое наредно кафе повторно да откривам земји - Кенија, Суматра, да ги откривам жетвите.“

Да се открива може во т.н. Бру барс. Во Келн неодамна беше отворен четвртиот. Откако водата ќе го исплакне вкусот на хартијата, се става кафе. Точно 60 грама на литар вода. Наука за себе. Нина Хојзер, вработена во еден ваков Бру бар, објаснува:

„Не смееме да го заборавиме времето на полевање. Треба да трае две до 2,5 минути, не подолго, зашто ќе се ослободат горчливите материи и кафето ќе биде прегорко.“

Рачно филтрираното кафе, кое има значително повеќе кофеин од едно еспресо, е готово. Се’ зависи од начинот на подготовка.

Михаел Глис ги потенцира разликите:

„За еспресото е потребно кратко време, висока температура, висок притисок од 10 бари. Во тие 15-20 секунди многу се потиснува. Значи, еспресото повеќе збива, компримира, а филтер-кафето, можеби може така да се каже - отвора. Ги отвора овие над илјада ароми за разлика од компримираното еспресо.“

Аманда Гацемајер и Макс Буркел се осмелија прват да пробаат филтер-кафе. Експлозија на вкусови или заматена вода? Аманда одговара: „Вообичаено не пијам кафе без млеко, но можам да си претставам понекогаш да испијам еден филџан вакво кафе, без млеко и шеќер.“

„Искрено, има повеќе арома отколку што претпоставував. Го опишуваат како заматена вода, но навистина може да се почувствува вкусот на кафето“, убедува Макс.

Рачното филтрирање е изум на Мелита Бенц од пред околу 100 години. Келнските студенти го открија наново. Стар метод на подготовка, кој можеби наскоро ќе збогати многу менија за пијалоци.