Еден од пилотите останал надвор од кабината

Аудио снимките од кокпитот на урнатиот авион на Џерманвингс покажуваат дека еден од пилотите ја напуштил кабината и не можел да се врати во неа во моментите додека авионот итал кон својот страшен крај во француските Алпи, објави весникот Њујорк Тајмс.
Од снимките не може јасно да се утврди зошто пилотот ја напуштил кабината, ниту од кои причини не можел повторно да се врати во неа, во моментите додека авионот веќе започна да ја губи висината и полека да паѓа кон планинскиот масив. Иследниците и денеска се уште ги проучуваат содржините од првата „црна кутија“, додека трае потрагата по втората.
„Лицето кое е надвор (од кабината) тивко чука на вратата, но нема одговор“, неименуван висок воен офицер кој учествува во истрагата изјавил за Њујорк Тајмс. „Потоа посилно удира по вратата, но повторно нема одговор. Воопшто не добива одговор“.
„На крајот може јасно да се слушне дека се обидува насила да ја отвори вратата“, вели иследникот.

Портпарол на Луфтханза, компанија која е сопственик на Џерманвингс, изјави дека ги знаат наводите од текстот на Њујорк Тајмс: „Засега немаме информации од властите кои би го потврдиле овој извештај и очекуваме повеќе информации. Нема да шпекулираме околу причината за несреќата“.

Откривањето на аудио-снимката од кабината се случи во моментите додека францускиот претседател Франсоа Оланд, германската канцеларка Ангела Меркел и шпанскиот премиер Мариано Рахој беа во посета на местото на несреќата за да им искажат почит на 150-те жртви.

Кој го контролирал леталото?

Француската служба за истражување на авионски несреќи БЕА, одбива да ги коментира наводите во печатот. Оттаму велат дека е се уште рано да се извлекуваат заклучоци од истрагата, иако потврдуваат дека на снимките „се слушаат гласови“. Од БЕА велат дека авионот почнал да ја губи висината една минута откако ја достигнал фазата на мирен лет и во следните девет минути паѓал.
Њујорк Тајмс цитира учесник во истрагата кој вели дека аудио снимката од кабината покажува многу „мирна и опуштена“ конверзација меѓу пилотите на почетокот на летот. Од снимката потоа може да се заклучи дека еден од пилотите ја напушта кабината.

„Се уште не ја знаеме причината зошто еден од пилотите излегува. Но она што е сигурно е дека на крајот на летот, едниот пилот е сам во кабината и не ја отвора вратата“.

Портпарол на Луфтхaнза вели дека од нападите во САД од 11 септември 2001 година, вратите на пилотската кабина не можат да се отворат однадвор, во согласност со новите правила.

Истрагата досега покажала дека авионот паѓал во права линија директно во планината, но иследниците не откриваат дали тоа се случувало под контрола на пилотот или на автоматски пилот. Она што засега е сигурно е дека во авионот не се случила никаква експлозија за време на летот, ниту пак нагла декомпресија.