Десните екстремисти посакуваат нови немири
30 октомври 2014ДВ: Демонстрациите на околу 5.000 десничарски екстремисти и хулигани во Келн го разбуди стравот дека е можен нов бран десничарски екстремизам во Германија. Дали десните радикали се во нов замав?
Вирхо: Десничарските групи ги прославија овие настани како голем успех на нивните Фејсбук страници и блогови. Тие ги контролираа улиците на Келн, а тоа не се случило веќе подолго време. Повеќето слични маршеви досега беа блокирани или беа следени од огромно полициско присуство. Но, овојпат илјадници можеа да маршираат низ Келн без ограничувања, некои од нив напаѓаа и други луѓе и новинари. Од нивен аспект, ова е голем успех.
Сметате ли дека протестите во Келн ќе привлечат нови симпатизери на радикалната десница?
Апсолутно. Оние кои не учествуваа ќе сакаат да бидат дел од следните немири. Тие сакаат да го повторат она што се случуваше во Келн, или дури и да го надминат. На маршевите во изминатите 10-15 години, десните екстремисти се обидуваа да го сведат насилството на минимум, за да не им биде забранет маршот. Но фудбалските хулигани и неонацистите во Келн не ја следеа таа тактика. Тие провоцираа судир.
Колку се опасни овие групи, или постои ли опасност од нов бран десничарски тероризам?
Не мислам дека оваа сцена планира систематски напади како што беше случајот со терористите од радикалната НСУ. Она што го гледаме е главно сурово улично насилство. И во оваа сцена сметаат дека Келн беше само почеток и дека ќе следува далеку повеќе. Тие во моментов дискутираат како да продолжат.
Дали тие формираат нови коалиции додека ги планираат следните маршеви?
Се работи за разновидна сцена. Во Келн видовме расистички фудбалски хулигани, неонацисти и членови на деснорадикални партии. Доколку оваа коалиција се покаже како цврста ќе си имаме работа со нова десничарска мрежа.
Како треба да реагираат германските власти по најавите за планирани нови маршеви во Берлин и Хамбург на овие групи?
Прво, овој феномен мора да се сфати сериозно, посериозно отколку пред да се случи Келн. Беше видливо дека полицијата не беше доволно подготвена. И многу полицајци настрадаа поради неподготвеноста. А потоа, треба да се разговара за тоа да се забрануваат маршеви чија единствена цел е да се шири насилство по улиците.
Доктор Фабијан Вирхо е професор на Универзитетот во Диселдорф. Тој ја предводи групата за истражување на десничарскиот екстремизам и нацизам.