Гнев и нови безредија во Фергусон
25 ноември 2014Сите повици за мирни протести останаа нечуени. Малиот град Фергусон доживеа ноќ на насилство. Камења летаа, луѓето трчаа низ облаци од солзавец, автомобилите гореа. Меѓу маскираните демонстранти се мешаа и жители на градот кои се обидуваа да ја смират зовриената ситуација, и многумина во меѓувреме поради безредијата се повлекоа во своите домови.
Гневот и разочарувањето дојде до израз кратко по 20 часот и 30 минути по локално време кога државниот обвинител Роберт МекКоло ја објави одлуката на поротата: „Тие не видоа основа да подигнат тужба против офицерот Вилсон“, рече тој.
Пред полицисата станица во Фергусон во тој момент беа собрани повеќе стотици луѓе. Тие преку радиото го следеа соопштението на државниот обвинител. Офицер Вилсон делувал според законот. „Законот предвидува: полицаец во одредедени ситуации смее да употреби смртоносно оружје“, рече МекКоло. Полицаецот не бил напаѓач и тој делувал во самоодбрана. Фотографии покажуваат повреди на неговата глава и неговиот врат.
Нејаснотија што се случи во кобната ноќ
Три месеци поротата која ја сочинуваа дванаесет мажи и жени го разгледуваше случајот. Тие сослушаа 60 сведоци и тројца вештаци, но изјавите на сведоците биле противречни. Сѐ уште нема точна слика, што се случило во таа ноќ. Кога постои сомнеж, поротата одлучи во корист на обвинетиот. Оваа пресуда не е изненадување. Веќе последните денови речиси никој повеќе не очекуваше дека полицаецот ќе мора да одговара пред суд, бидејќи ноќта на 9. август го застрела 18 годишниот Мајкл Браун.
Обама повика на смиреност
Претседателот Барак Обама, кратко откако беше објавена одлуката на поротата се обрати во јавноста. И тој од далечниот Вашингтон се обиде да делува смирувачки врз демонстрантите во Фергусон. „Ова не е случај само за Фергусон, туку за САД“, рече тој. Претседателот призна дека кај силите за безбедност имало случаи на расизам: „Но овој проблем нема да се реши ако се фрлаат шишиња или се демолираат автомобили или дури се повредуваат луѓе“, рече претседателот.
Полицијата со недели се подготвуваше за оваа ноќ. Гувернерот воведе вонредна состојба. Исто така и мајка му на Мајкл Браун беше меѓу демонстрантите. Кога беше објавена пресудата, болката целосно ја обзеде. И покрај сета тага, родителите на Мајкл Браун замолија да не се употребува насилство.