یوکرائنی تنازعے کا واحد حل سفارتکاری ہے، میرکل

خبر رساں ادارے ڈی پی اے نے برلن سے موصولہ اطلاعات کے حوالے سے بتایا ہے کہ چانسلر میرکل نے اس عزم کا اظہار کیا ہے کہ ان کی حکومت یوکرائن کے تنازعے کے حل کے لیے سفارتکاری کا راستہ اختیار کیے رکھے گی۔ انہوں نے کہا کہ یہ مسئلہ صرف پرامن مذاکرات کے ذریعے ہی حل ہو سکتا ہے اور برلن حکومت روسی حکام کے ساتھ مل کر اس تنازعے کا حل نکال لے گی۔

بدھ کے دن جرمن پارلیمان سے خطاب کرتے ہوئے چانسلر میرکل نے یوکرائن تنازعے کے حل کے لیے اپنی حکمت عملی پر تبصرہ کرتے ہوئے کہا، ’’ یہ راستہ شاید طویل اور پیچیدہ ہو لیکن میں قائل ہوں کہ ہم اپنے اہداف حاصل کر لیں گے۔‘‘ انہوں نے روس پر اقتصادی پابندیوں کو ناگزیر قرار دیتے ہوئے کہا کہ ان کا مقصد دراصل یوکرائن کی خودمختاری اور سالمیت کو یقینی بنانا ہے۔

جرمن چانسلر میرکل نے مشرقی یوکرائن میں قیام امن کو یقینی بنانے کے حوالے سے کہا، ’’ہمیں صبر سے کام لیتے ہوئے مستقل مزاج رہنا ہو گا۔‘‘ انہوں نے ماسکو حکومت پر یہ الزام بھی عائد کیا کہ اس خطے میں کریملن کی پالیسیوں نے یورپ کی سلامتی کو خطرے میں ڈال دیا ہے۔ میرکل نے دہرایا کہ روسی حکومت بین الاقوامی قوانین کی خلاف ورزی کی مرتکب ہو رہی ہے۔

مشرقی یوکرائن میں اپریل سے شروع ہونے والے بحران کے نتیجے میں چار ہزار افراد لقمہ اجل بن چکے ہیں۔ ان علاقوں میں یوکرائنی فوج اور روس نواز باغیوں کے مابین تازہ جھڑپوں کی اطلاعات بھی موصول ہو رہی ہیں۔ کییف اور مغربی ممالک کا الزام ہے کہ ماسکو حکومت مشرقی یوکرائن میں فعال اپنے حامی باغیوں کی مدد کر رہی ہے لیکن روسی حکام مسلسل اس الزام کو مسترد کرتے ہیں۔

ایک اور پیشرفت میں یورپ میں مغربی دفاعی اتحاد نیٹو کے سپریم کمانڈر فلپ بریڈلو یوکرائن کا دورہ کر رہے ہیں۔ یوکرائنی وزیر اعظم آرسینی یاٹسینی یُک کے دفتر سے جاری ہونے والے بیان میں کہا گیا ہے کہ سپریم کمانڈر اور وزیر اعظم نے شورش زدہ علاقوں میں عسکری تعاون پر تبادلہ خیال کیا۔ بریڈلو نے اس دوران یوکرائنی وزیر اعظم کو بھرپور تعاون کا یقین بھی دلایا۔

اس ملاقات کے بعد امریکی جنرل فلپ بریڈلو نے اپنے ٹوئٹر پیغام میں کہا، ’’اس بحرانی صورتحال میں یوکرائن اکیلا نہیں ہے۔‘‘ یہ امر اہم ہے کہ یوکرائنی حکومت اس عزم کا اظہار کر چکی ہے کہ وہ نیٹو میں شمولیت کے حق میں ہے لیکن اس پر روس نے سخت تحفظات کا اظہار کیا ہے۔ ماسکو کے مطابق اس قسم کی کوئی بھی پیشرفت اس خطے میں مزید تناؤ کا باعث بن جائے گی۔