یورپی یونین کا سربراہ اجلاس آج جمعرات سے

برسلز ميں يورپی يونين کے وزرائے خزانہ کے بدھ کے روز ہونے والے اجلاس ميں بلاک کے ليے مشترکہ بينکنگ يونين کے قيام کے حوالے سے اتفاق رائے کرتے ہوئے ڈیل کو حتمی شکل دے دی گئی ہے۔'سنگل ريزولُوشن مکينيزم‘ (SRM) کہلائے جانے والے اس نظام کے تحت يورو زون کے مالی مشکلات کے شکار بينکوں کی يا تو مالی معاونت کی جائے گی يا انہيں ختم کر ديا جائے گا تاکہ ان کے قرضوں کا مالی بوجھ حکومتوں پر نہ پڑے۔ اب اگلے مرحلے ميں اس سمجھوتے کی توثیق یورپی لیڈران اپنے اجلاس میں کریں گے اور ہو سکتا ہے کہ یہ عمل آج سے شروع ہونے والے اجلاس میں مکمل کر لیا جائے۔

بینکنگ یونین پر پیدا ہونے والے اتفاق رائے کو یورپی ماہرین اقتصادیات و معاشیات نے ایک تاریخی اسٹیپ قرار دیا ہے اور اُن کے مطابق یہ معاشی عمل میں استحکام کا باعث ہو گا۔ برسلز میں ڈیل کے بعد فرانسیسی وزیر خزانہ پیئر ماسکویسی نے اسے ایک تاریخی معاہدہ قرار دیتے ہوئے یورپی یونین کے لیے انتہائی اہم قرار دیا۔ جرمن وزیر خزانہ وولف گانگ شوئبلے کا کہنا تھا کہ بیکنگ یونین کی ڈیل مشترکہ یورپی کرنسی کو کامیابی سے مستحکم کرنے اور مالیاتی منڈیوں میں اِس امر کی یقین دہانی کروانے کی جانب ایک اہم قدم ہے کیونکہ یورپی کرنسی اپنے پیچیدہ ڈھانچے کے باوجود بظاہرکام کر رہی ہے لیکن استحکام اور دوسرے مقاصد کے لیے بینکنگ یونین کی ضرورت ہے۔

مبصرین کے خیال میں یورو زون کی ریاستوں میں پائے جانے والے مالی بحران اور بینکاری نظام کی زبُوں حالی نے بینکنگ یونین کے قیام کی راہ کو ہموار کیا ہے۔ اِس مناسبت سے آئر لینڈ اور اسپین کے مالی بحرانوں میں بینکوں کے کمزور کردار کو خصوصیت سے دیکھا اور پرکھا گیا تھا۔ بینکنگ یونین کے طے پانے والے معاہدے کے توثیقی عمل کی تکمیل کے بعد یورو زون کی تمام ریاستیں اِس ڈیل پر عمل پیرا ہونے کی پابند ہوں گی جب کہ یورپی یونین کے وہ رکن ریاستیں جو یورو کرنسی گروپ میں شامل نہیں وہ چاہیں تو بینکنگ یونین کا حصہ بن سکیں گی۔

اقتصادی مسائل کے ساتھ ساتھ یورپی یونین کی دو روزہ سمٹ میں دفاعی معاملات پر بھی گفتگو کی جائے گی۔ یورپی یونین کے ذرائع کے مطابق اٹھائیس رکنی بلاک کے لیڈران یوکرائن میں تین چار ہفتوں سے یانوکووچ حکومت کے خلاف مظاہرہ کرنے والوں کے ساتھ ہمدردی اور اظہار یک جہتی کا پیغام ارسال کر سکتی ہے۔ سمٹ کے اجلاسوں میں شام کے بحران اور وسطی افریقی جمہوریہ میں افراتفری اور فرانسیسی فوجی کارروائی کو بھی زیر بحث لایا جائے گا۔