یمن میں امن کے لیے ایرانی تجویز، سعودی عرب کی سرد مہری

ایرانی وزیر خارجہ محمد جواد ظریف نے ہسپانوی دارالحکومت میڈرڈ میں یمن کے لیے یہ امن منصوبہ تجویز کیا ہے۔ انہوں نے کہا کہ اس منصوبے میں یمن میں فائربندی، انسانی بنیادوں پر امداد کے علاوہ یمنی تنازعے کے فریقین کے مابین بات چیت اور ایک نمائندہ حکومت کا قیام بھی شامل ہے۔ ایک پریس کانفرنس میں ظریف کا مزید کہنا تھا، ’’یہ مسئلہ یمنیوں کو خود حل کرنا چاہیے۔ ایران اور سعودی عرب ایک دوسرے سے بات تو کر سکتے ہیں لیکن ان دونوں ملکوں کو یمن کے مستقبل کا فیصلہ کرنے کا اختیار نہیں۔‘‘

ایرانی وزیر خارجہ کا مزید کہنا تھا کہ فضائی کارروائیاں اور حوثیوں پر بمباری مسئلے کا حل نہیں ہے۔ ’’ تمام زمینی اور فضائی حملوں کو فوری طور پر روکا جانا چاہیے‘‘۔ اس سے قبل جواد ظریف یمن کے لیے ایک نئی حکومت اور اس معاملے میں تعاون کرنے کی پیشکش کر چکے ہیں۔

ایران کی جانب سے امن قائم کرنے کی یہ تجویز ریاض حکومت کو خوش نہیں کر سکے گی کیونکہ سعودی حکومت پہلے ہی کہہ چکی ہے کہ وہ منصور ہادی اور ان کی حکومت کو ہر حال میں حوثی باغیوں سے محفوظ رکھے گی۔ جلا وطنی اختیار کر جانے والے یمنی صدر ہادی کے حامی دستوں نے دعوٰی کیا ہے کہ وہ ملک کے جنوب میں واقع کئی علاقوں سے حوثی باغیوں کو پسپا کرنے میں کامیاب ہو گئے ہیں۔ ان کے مطابق انہیں عدن میں بھی کچھ کامیابیاں ملی ہیں۔ بتایا گیا ہے کہ شدید لڑائی کے بعد حوثی باغی عدن کے اُس علاقے سے باہر نکل گئے ہیں، جہاں سفارت خانے اور بین الاقوامی ہوائی اڈہ موجود ہے۔

سعودی عرب اور اُس کے سنی اتحادیوں نے 25 مارچ سے عدن کو حوثی باغیوں سے آزاد کرانے کے لیے بمباری شروع کی تھی۔ شیعہ حوثی باغیوں سے گزشتہ برس ستمبر سے یمنی دارالحکومت صنعاء پر قبضہ کیا ہوا ہے۔ اس کے بعد حوثی باغیوں نے صدر ہادی کو بھی ان کے صدارتی محل سے بے دخل کر دیا۔ بعد ازاں فروری میں وہ عدن چلے گئے تھے تاہم گزشتہ ماہ سے وہ ریاض میں مقیم ہیں۔