گرِم برادران کی دیومالائی کہانیوں کو دو سو سال ہو گئے

’سنو وائٹ‘، ’سنڈریلا‘ اور ’ہانزل اینڈ گریٹل‘ یاکوب اور ولہیلم گرِم نامی دو بھائیوں کی لکھی گئی دیومالائی کہانیوں میں سے ایسی ہیں جن سے دنیا کے اکثر انسان اچھی طرح واقف ہیں۔ گرِم برادران کی لکھی گئی کتاب Children's and Household Tales پہلی مرتبہ 20 دسمبر 1812ء کو شائع ہوئی تھی۔ اس کتاب میں بچوں کی بہت سی کہانیاں شامل ہیں۔ گزشتہ دو سو سال کے دوران یہ کہانیاں دنیا کی 170 سے زائد زبانوں میں ترجمہ ہو چکی ہیں اور عالمی سطح پر بچوں کی بہترین کہانیاں قرار دی جاتی ہیں۔

اس کتاب کا دو صدیاں پرانا پہلا ایڈیشن آج بھی جرمنی کے شہر کاسل کے گرِم برادرز میوزیم میں رکھا ہوا ہے۔ سن 2005 میں اقوام متحدہ کے سائنسی، تعلیمی اور ثقافتی ادارے یونیسکو نے اسے اپنی ’عالمی دستاویزی میراث‘ کی فہرست میں شامل کر لیا تھا۔

جرمن شہر کاسل کی یونیورسٹی کے پروفیسر ہولگر ایرہارڈ کہتے ہیں، ’پریوں کی کہانیاں قدیم ترین انسانی کہانیوں کے سوا کچھ بھی نہیں اور یاکوب اور ولہیلم گرِم نے ایسی ہر شے کو ایک جگہ پر جمع کرنے کی کوشش کی، جس کا تعلق قدیم جرمن معاشرت سے بنتا تھا‘۔

پروفیسر ہولگر ایرہارڈ گرِم برادران اور ان کی تخلیقات سے متعلقہ علوم کے ماہر ہیں۔ وہ کہتے ہیں کہ اپنی اسی خصوصیت کی وجہ سے یہ دیومالائی کہانیاں ماضی میں ہمارے دور کی ابتدا تک جاتی ہیں۔ ان کے مطابق، ’گرِم برادران کی کہانیوں میں مثال کے طور پر ان قدیم بھارتی دیومالائی کہانیوں کے اثرات بھی شامل ہیں، جو پہلی صدی عیسوی کے دور کی کہانیاں ہیں‘۔

گرِم برادران کی کہانیوں میں سے اکثر میں ہمیشہ ایک گہرا پیغام ہوتا ہے۔ پروفیسر ایرہارڈ کے بقول انسانوں نے شاید اپنے بچوں کو تعلیمی مقاصد کے لیے پریوں کی کہانیاں ہمیشہ ہی سنائی ہیں۔ وہ کہتے ہیں کہ ان کہانیوں میں ہمیشہ ایک سبق ہوتا ہے اور اسی لیے یہ صرف بچوں کے لیے ہی نہیں ہوتیں۔ ’’بالغ انسانوں کو بھی اکثر ان کہانیوں سے بہت سے قدرتی عوامل کو سمجھنے کا موقع ملتا ہے، مثال کے طور پر بجلی کا گرجنا۔ یعنی یہ کہ آخر کوئی نہ کوئی تو اس کی وجہ بنا ہو گا؟‘

یاکوب گرِم 1785ء میں پیدا ہوئے تھے اور ان کا انتقال 1863ء میں ہوا تھا۔ ان کے چھوٹے بھائی ولہیلم گرِم یاکوب سے ایک سال بعد 1786ء میں پیدا ہوئے تھے اور ان کا انتقال 1859ء میں اپنے بڑے بھائی سے چار سال پہلے ہوا تھا۔ ان دونوں بھائیوں نے دیومالائی کہانیاں جمع کرنے کا کام 1806ء میں شروع کیا تھا۔ اس مقصد کے لیے ان دونوں بھائیوں نے بہت زیادہ سفر نہیں کیا تھا بلکہ انہوں نے ان لوگوں تک زیادہ رسائی حاصل کی تھی جن کے بارے میں انہیں علم تھا کہ وہ انہیں ایسی کہانیاں سنا سکتے تھے۔

شروع میں گرِم برادران کی یہ مدد کاسل میں رہنے والے دو خاندانوں نے کی اور بعد میں یہی کام ایک مقامی درزی کی بیوی نے کیا جس کا نام ڈوروتھیا فیہمان تھا۔ اسی ڈوروتھیا فیہمان کے بارے میں پروفیسر ہولگر ایرہارڈ نے ابھی حال ہی میں اپنی ایک نئی کتاب بھی لکھی ہے۔

پروفیسر ایرہارڈ کہتے ہیں کہ گرِم برادران نے ان کہانیوں کو اس طرح بدلا کہ ان میں سے ان کی پریوں کی کہانیوں نے جنم لیا۔ پھر یہ کہانیاں اس دور کے جرمن معاشرے سے نکل کر پوری دنیا میں پھیل گئیں۔

ان کہانیوں کا مرکزی کردار اکثر ایک ایسی چھوٹی سی لیکن بہت اچھی بچی ہوتی ہے، جس سے پہلے تو کوئی بہت بڑی اور شدید غلطی ہو جاتی ہے لیکن جو کہانی کے آخر میں ہمیشہ اپنے لازمی طور پر خوش کر دینے والے مقام تک پہنچ جاتی ہے۔

گرِم برادران کے بارے میں جرمنی میں اگلے پورے سال کے دوران بہت سی تقریبات منعقد کی جائیں گی۔ 20 ستمبر 2013ء کے روز یاکوب گرِم کو انتقال کیے ٹھیک 150 سال ہو جائیں گے۔

(ij /mm (dpa