چانسلر میرکل کے فون کی نگرانی کا اسکینڈل، باقاعدہ تحقیقات ہوں گی

جرمنی کے وفاقی چیف پراسیکیوٹر ہارالڈ رانگے نے بدھ چار جون کو پارلیمان کو بتایا ہے کہ امریکی خفیہ ایجنسی این ایس اے کی طرف سے جرمن چانسلر انگیلا میرکل کے موبائل فون کی مبینہ جاسوسی کی باقاعدہ تحقیقات کی جائیں گی۔ گزشتہ ہفتے کے دوران موصول ہونی والی اطلاعات سے معلوم ہو رہا تھا کہ غالباﹰ اس کیس پر کوئی قانونی کارروائی نہیں کی جائے گی، جس پر متعدد ممبران پارلیمان کے علاوہ مقامی میڈیا نے شدید تنقید کی تھی۔

جرمن اٹارنی جنرل رانگے نے بدھ کو ایک خصوصی پارلیمانی کمیٹی کو اس کیس سے متعلق ابتدائی تحقیقات سے آگاہ کیا اور کہا کہ اس سلسلے میں مزید تحقیقات کی جائیں گی۔ بعد ازاں انہوں نے صحافیوں سے گفتگو کرتے ہوئے کہا کہ این ایس اے کی طرف سے جرمن عوام کی نگرانی بھی ایک مسئلہ ہے لیکن فی الحال اس ضمن میں باقاعدہ تحقیقات کے لیے جواز نہیں ہے۔

دوسری طرف جسٹس منسٹر ہیکو ماس نے ایسی خبروں کو مسترد کر دیا ہے کہ عوامی اور سیاسی دباؤ کی وجہ سے وفاقی دفتر استغاثہ نے چانسلر میرکل کی نگرانی کے کیس کو آگے بڑھانے کا فیصلہ کیا ہے۔ بدھ کے دن ایک مقامی ریڈیو سے گفتگو کرتے ہوئے ماس نے کہا کہ رانگے نے اس کیس کو شروع سے ہی انتہائی اہم سمجھا تھا اور اس حوالے سے ان کی طرف سے مزید تحقیقات کا فیصلہ قانون اور انصاف کے تقاضوں کو ملحوظ رکھتے ہوئے کیا گیا ہے۔

ایک ایسے وقت میں جب امریکا اور یورپ میں اس کے اہم اتحادی ملک جرمنی کے رہنماؤں کی کوشش ہے کہ جاسوسی کے اس اسکینڈل کے بعد دونوں ممالک کے تعلقات معمول پر آ جائیں، اس پیشرفت سے صورتحال ایک مرتبہ پھر کشیدہ ہو سکتی ہے۔

دوسری طرف امریکی اسٹیٹ ڈیپارٹمنٹ کی نائب ترجمان میری ہیرف نے کہا ہے کہ اس اسکینڈل کے تناظر میں جرمن تحفظات کو دور کرنے کا بہترین ذریعہ سفارتکاری ہے۔ انہوں نے کہا کہ جب اپریل میں چانسلر میرکل نے امریکا کا دورہ کیا تھا کہ تو صدر اوباما نے ان کے ساتھ ان الزامات پر مفصل تبادلہ خیال کیا تھا۔

جرمن دفتر استغاثہ کی طرف سے اس کیس کی باضابطہ تحقیقات کے حوالے سے پوچھے گئے ایک سوال کے جواب میں میری ہیرف کا کہنا تھا، ’’سفارتکاری کے ذریعے اس مسئلے کو حل کرنا شاید بہتر ہو گا۔‘‘ انہوں نے مزید کہا کہ انہیں ایسی معلومات نہیں ہیں کہ جرمنی کی طرف سے شروع کی جانے والی تحقیقات میں واشنگٹن حکومت جرمن دفتر استغاثہ کے ساتھ تعاون کرے گی یا نہیں۔

این ایس اے کے سابق کانٹریکٹر ایڈورڈ سنوڈن کی طرف سے گزشتہ برس جون میں منظر عام پر لائی گئیں خفیہ دستاویزات میں جب ایسے الزامات سامنے آئے تھے کہ امریکا نے جرمن چانسلر کی نگرانی بھی کی ہے تو میرکل نے کہا تھا کہ دوستوں کی نگرانی نہیں کی جاتی ہے۔ میرکل نے اس اسکینڈل پر تبصرہ کرتے ہوئے یہ بھی کہا تھا کہ ان الزامات سے ان کے اعتماد کو دھچکا لگا ہے اور اب اس اعتماد کو بحال کرنے کی ضرورت ہے۔