پاکستانی، بھارتی سرحدی دستوں کے مابین فائرنگ، نو سویلین ہلاک

بھارت کے زیر انتظام جموں کشمیر میں سری نگر سے موصولہ رپورٹوں کے مطابق ان شہریوں میں سے پانچ بھارتی باشندے تھے جبکہ پاکستانی عسکری ذرائع کے مطابق چار ہلاک شدگان کا تعلق پاکستان سے تھا اور ان کی موت سرحد پار سے بھارتی دستوں کی طرف سے کی جانے والی فائرنگ کے نتیجے میں ہوئی۔

خبر ایجنسی اے ایف پی نے لکھا ہے کہ نئی دہلی اور اسلام آباد دونوں نے ہی تقسیم کا شکار مسلم اکثریتی ریاست جموں کشمیر میں اس نئی خونریزی اور کنٹرول لائن پر پائی جانے والی کشیدگی میں اضافے کا الزام ایک دوسرے پر لگایا ہے۔

بھارتی پولیس نے کہا ہے کہ پاکستان کے نیم فوجی دستوں نے نئی دہلی کے زیر انتظام کشمیر میں بھارتی بارڈر سکیورٹی فورس کی سرحدی چوکیوں اور چند سرحدی دیہات پر مبینہ طور پر مارٹر فائر کیے، جن کے نتیجے میں کم از کم پانچ بھارتی باشندے ہلاک اور 30 سے زائد زخمی ہو گئے۔

اس کے برعکس پاکستانی فوج کے آج پیر کے روز جاری کردہ ایک بیان میں کہا گیا ہے کہ عید کے روز سیالکوٹ کے قریب دونوں ملکوں کے درمیان ’ورکنگ باؤنڈری‘ پر بھارتی بارڈر سکیورٹی فورس BSF کے ارکان کی مبینہ طور پر بلااشتعال کی گئی فائرنگ کے نتیجے میں چار سویلین ہلاک ہو گئے، جن میں دو بچے بھی شامل ہیں۔

پاکستانی شہر سیالکوٹ اور اس کا نواحی علاقہ بھارتی ریاست پنجاب کی سرحد کے ساتھ ملتا ہے۔ پاکستانی عسکری ذرائع کے بقول اسی علاقے میں بھارتی دستوں کی فائرنگ سے اگست کے مہینے میں بھی دو پاکستانی شہری ہلاک ہو گئے تھے۔ اس کے علاوہ عیدالضحیٰ کے موقع پر پاکستانی حکام کے مطابق بھارتی دستوں نے کشمیر میں کنٹرول لائن کے پار سے بھی پاکستان کے زیر انتظام چار علاقوں پر مشین گنوں سے فائرنگ کی اور گولے بھی پھینکے لیکن اس کارروائی میں کوئی شخص ہلاک یا زخمی نہیں ہوا۔

بھارت کے زیر انتظام کشمیر میں ہونے والی ہلاکتوں کے بارے میں علاقائی پولیس کے ڈائریکٹر جنرل کے۔ راجندر نے اے ایف پی کو بتایا کہ پاکستانی دستوں کی مبینہ فائرنگ اور گولہ باری سے پانچ افراد اس وقت مارے گئے جب جنوبی جموں کے علاقے میں آرنیا کے سیکٹر میں مقامی دیہات کے چند مکانات اور ایک بس سٹینڈ اس شیلنگ کی زد میں آ گئے۔ کے۔ راجند نے بتایا کہ کنٹرول لائن پر اس فائرنگ کا آغاز اتوار کو رات گئے ہوا، جو پیر کی دوپہر تک وقفے وقفے سے جاری تھا۔