وینس: فلمی ستاروں کی چمک دمک

بدھ کے روز وینس فلم فیسٹیول کا افتتاح میکسیکو سے تعلق رکھنے والے ڈائریکٹر الیخاندرو گونزالیس کی فلم ’برڈ مین‘ سے ہوا۔ اس فلم میں مرکزی کردار مائیکل کیٹن ادا کر رہے ہیں۔ کیٹن ’بیٹ مین‘ اور ’بیٹل جوس‘ نامی فلموں کے حوالے سے جانے جاتے ہیں۔ ’برڈ مین‘ بھی ان بیس فلموں میں شامل ہے، جو گولڈن لائن کے مقابلے میں شامل ہیں۔

اس فلم میں انہوں نے ایک ایسے ہیرو کا کردار ادا کیا ہے، جو ماضی میں ’برڈ مین‘ نامی فلم میں اپنے کردار کی وجہ سے شہرت کی بلندیوں پر پہنچا تھا اور جسے اب اسے فراموش کر دیا گیا ہے۔ اب وہ براڈ وے تھیٹر پر زیادہ متاثرکن کارکردگی دکھا کر شو بزنس کی دنیا میں اپنا کھویا ہوا مقام اور شان و شوکت حاصل کرنے کی کوششوں میں لگا ہوا ہے۔ تاہم اسٹیج پرفارمنس کے دوران ’برڈ مین‘ کا کردار اُس کا پیچھا نہیں چھوڑتا اور اس کے لیے اس کردار کے حصار سے باہر نکلنا ممکن نہیں ہوتا اور ساتھ ہی اُس کےکانوں میں یہی صدائیں گونجتی رہتی ہیں کہ اُسے فلمی اسکرین پر واپس لوٹنا چاہیے۔ برڈ مین پر تبصرہ کرتے ہوئے مائیکل کیٹن نے کہا، ’’مجھے برڈ مین کا خیال بہت پسند آیا۔ ہم سب کی زندگی میں ایک برڈ مین ہوتا ہے، جسے ہم اپنی منفی انا کہہ سکتے ہیں۔ یا تو آپ اُس کے ساتھ سمجھوتہ کر لیں یا پھر اُسے نظر انداز کرتے ہوئے اپنی زندگی کی گاڑی کی پچھلی نشست پر بٹھا دیں۔ لیکن یہ گاڑی آپ کو ہی چلانا ہو گی۔‘‘

وینس فیسٹیول میں مقابلے کے لیے پیش کی جانے والی فلموں میں ترک نژاد جرمن ہدایتکار فاتح آکن کی کاوش ’دی کٹ‘ بھی شامل ہے۔ اس فلم میں انہوں نے پہلی عالمی جنگ کے دوران آرمینیائی شہریوں کے قتل عام کے متنازعہ موضوع کا انتخاب کیا ہے اور اس میں ایک ایسے والد کی کہانی بیان کی گئی ہے، جو اپنی بیٹی کو تلاش کر رہا ہے۔

اس سال مقابلے میں ایک دستاویزی فلم بھی شامل ہے۔ یوشا اوپنہائمر نے ’’The Look of Silence‘‘ نامی یہ فلم انڈونیشی تاریخ کے سیاہ باب پر بنائی ہے۔ اس سے قبل اُن کی فلم ’’ The Act of Killing ‘‘ کو آسکر ایوارڈ دیا جا چکا ہے۔

اس فیسٹیول کے دونوں سربراہ پاؤلو باراتا اور البیرتو باربیرا کے مطابق فلمی میلے کا پروگرام انتہائی دلچسپ انداز میں ترتیب دیا گیا ہے۔ ان کے بقول میلے کے دوران مجموعی طور پر پچپن فلمیں دکھائی جائیں گی۔ اس کے علاوہ وینس کلاسک کے شعبے میں فلمی دنیا کی21 نایاب تخلیقات کو تکنیکی طور پر جدید اور بہتر بنا کر پیش کیا جا رہا ہے۔

تاریخی شہر وینس میں گیارہ دن تک فلمیں اور فلمی ستارے ہی دکھائی دیں گے اور آخر میں ایک ہی ہدایتکار گولڈن لائن کا حقدار ٹھہرایا جائے گا۔ گولڈن لائن کے حقدار فاتح آکن ہوتے ہیں یا الیخاندرو گونزالیس، اس کا فیصلہ جیوری کرے گی، جس کی قیادت فرانس کے مشہور فلم کمپوزر الیکساندرے دیسپلا کریں گے، جو ’دی کنگز اسپیج‘ اور ’ہیری پوٹر اینڈ دی ڈیتھلی ہالوز‘ جیسی فلموں کی موسیقی دے چکے ہیں۔ جیوری میں جرمن ہدایتکار فلپ گروئننگ بھی شامل ہیں، جو 2013ء میں وینس فلم فیسٹیول میں ایک خصوصی ایوارڈ حاصل کر چکے ہیں۔