معذوری کمزوری نہیں ہوتی، پاکستانی نیشنل چیمپین اسداللہ

اسداللہ کو چھ ماہ کی عمر میں پولیو کے مرض نے اپنی لپیٹ میں لے لیا اور ہمیشہ کے لیے دونوں ٹانگوں سے معذور ہوگیا۔ لیکن اس نوجوان نے اس معذوری کو اپنی کمزوری نہیں بنایا۔ بارہویں جماعت کا یہ طالب علم گزشتہ دس برسوں سے پاکستان ویل چیئر سو میٹر، دوسو میٹر، تین کلو میٹر اور چھ کلومیٹر ریس(Wheel Chair Race)کا نیشنل چیمپین ہے۔ اسد اللہ نے ڈی ڈبلیو سے بات کرتے ہوئے بتایا، ’’میری رینکنگ آل پاکستان نمبر ون ہے اور یہی پوزیشن میری دس سال سے مسلسل چلتی آرہی ہے۔ 2013ء اور 2014ء دونوں برسوں میں، میں نے مسلسل دو گولڈمیڈل جیتے۔‘‘

سن 2005ء سے لے کر اب تک چار گولڈ میڈل اور 80 سے زائد دیگر میڈلز اور ایوارڈ جیتنے والے اسداللہ کا کہنا ہے کہ بچپن ہی سے اس کو تعلیم حاصل کرنے کا بہت شوق تھا، غربت اور معذوری کی وجہ سے اس کی اتنی حیثیت نہیں تھی کہ وہ اپنے لیے گھر والوں سے ایک ویل چیئر کی فرمائش کر سکیں۔ اسداللہ کے والد رکشہ چلا کر گھر کے گیارہ افراد (والدین اور نو بہن بھائی) کا خرچ برداشت کرتے تھے۔ اسد اللہ کا کہنا تھا، ’’میں نے ہمت نہیں ہاری اور کبھی لوگوں کی مدد سے تو کبھی خود ہاتھوں کے بل اسکول تک جایا کرتا تھا۔‘‘

اسد اللہ کہتے ہیں کہ صحت مند لوگوں کو کھیلتے دیکھ کر شروع میں ان کو بہت مایوسی ہوتی تھی کہ وہ کیوں ان کی طرح نہیں کھیل سکتے لیکن اب وہ فخر کے ساتھ بتاتے ہیں کہ وہ نا صرف دوڑ میں پاکستان کا چیمپین ہے بلکہ وہ دیگر کھیل ویٹ لفٹنگ، ٹیبل ٹینس، لان ٹینس، سوئمنگ اور باسکٹ بال سمیت دیگر کھیل بھی عام لوگوں کی طرح ویل چیئر پر بیٹھ کر کھیل سکتا ہے۔

اسد اللہ کی یہ خواہش ہے کہ حکومت اس کو بین الاقوامی پیرا اولمپکس مقابلوں میں پاکستان کی نمائندگی کرنے کا موقع دے تاکہ ملک کے لیے گولڈ میڈل حاصل کیا جا سکے۔ اسداللہ کی نظریں 2016ء میں ہونے والے اولمپکس پر لگی ہیں۔ اسداللہ کے مطابق پاکستان میں معذوروں کو اتنی سہولیات نہیں دی جاتی جتنی صحت مند افراد کو دی جاتی ہے۔
دوسری طرف پاکستان اسپورٹس بورڈ کے ڈائریکٹر محب اللہ کا کہنا ہے، ’’پاکستان میں بہت ذیادہ ٹیلنٹ موجود ہے، خاص طور پر معذور افراد نے ہمیشہ ملک کا نام روشن کیا ہے، چاہے وہ ایتھلیٹکس مقابلے ہوں یا پھر کرکٹ کے میچ۔‘‘

وہ اسد اللہ کے بارے میں کہتے ہیں، ’’اس نوجوان نے تو پاکستان کا نام روشن کیا ہے، ہم ان لوگوں کو بھی کہتے ہیں، جنہوں نے نام روشن نہیں کیا کہ وہ بھی آئیں اور ان کو جس قسم کی بھی ضرورت ہو،تو ہم ان کو سہولیات فراہم کریں گے اور یہ بہت اچھی بات ہے کہ معذور لوگ آئیں اور آگے بڑھیں اور ملک کا نام روشن کریں‘‘۔

اسداللہ کے دوستوں کا بھی یہی خیال ہے کہ ہمت، حوصلہ اور خود اعتمادی کی بات کی جائے تو اس کی زندہ مثال اسداللہ ہے، جس نے کم وسائل، غربت اور پولیو کا مریض ہونے کے باوجود یہ ثابت کر دیا ہے کہ معذوری نام کی کوئی چیز نہیں ہوتی۔ اسداللہ بھی کہتے ہیں کہ اگر عزائم پختہ ہوں تو منزل دور نہیں ہوتی،’’ہمارے ہاں معذور اس کو سمجھا جاتا ہے، جس کے ہاتھ پاؤں نہ ہوں لیکن یہ غلط بات ہے کیونکہ معذوری لوگوں کے ذہنوں میں ہے، یہاں کوئی بھی معذور نہیں ہے، کیونکہ معذور تو اس بندے کو کہا جاتا ہے جو کوئی کام نہ کر سکتا ہو۔‘‘