مشرقی یوکرائن میں روس نواز باغیوں کی مورچہ بندیاں

مشرقی یوکرائن میں زیادہ تر روسی نسل کی آبادی والے علاقوں میں روس نواز باغیوں نے جن سرکاری عمارات پر کئی دنوں سے قبضہ کر رکھا ہے، وہاں انہوں نے آج منگل کے روز ان عمارات اور ان کے ارد گرد اپنی پوزیشنیں مضبوط بناتے ہوئے مورچہ بندیاں شروع کر دیں۔

مشرقی یوکرائن کے شہر اِیزییُم سے ملنے والی رپورٹوں میں نیوز ایجنسی ایسوسی ایٹڈ پریس نے بتایا کہ یہ شہر اس وقت ایسے مسلح باغیوں کے کنٹرول میں ہے، جنہوں نے جگہ جگہ رکاوٹیں کھڑی کر کے عارضی مورچے بنانے شروع کر دیے ہیں۔

کییف میں یوکرائن کی عبوری حکومت یہ اعلان کر چکی ہے کہ ایسے باغیوں کے خلاف ’انسداد دہشت گردی کے لیے بھرپور آپریشن‘ کیا جائے گا۔ اس وقت یوکرائن کے فوجی دستے اپنے ٹینکوں کے ساتھ اِزیُم کے باہر تک پہنچ چکے ہیں۔ مشرقی یوکرائن میں ملکی اور غیر ملکی توجہ اس وقت سلوویانسک کے شہر پر بھی مرکوز ہے، جسے روس نواز باغیوں نے گزشتہ ویک اینڈ پر اپنے کنٹرول میں لے لیا تھا۔ روسی سرحد سے 160 کلو میٹر کے فاصلے پر واقع یوکرائن کا یہ شہر بظاہر پوری طرح باغیوں کے کنٹرول میں ہے۔

ایسے میں مشرقی یوکرائن میں خونریز تصادم کا خطرہ بہت زیادہ ہو گیا ہے، اور اس بارے میں مشاورت کے لیے یورپی یونین کے رکن ملکوں کے وزرائے دفاع کا ایک اجلاس آج منگل کو لکسمبرگ میں ہوا۔ اس اجلاس میں خاص طور پر مغربی دفاعی تنظیم نیٹو کے سیکرٹری جنرل آندرس فوگ راسموسن بھی شریک ہوئے۔

راسموسن کے مطابق یوکرائن کے بحران کے حوالے سے یہ بات یقین سے نہیں کہی جا سکتی کہ روس کا اگلا قدم کیا ہو گا۔ ان کے بقول اسی لیے اس امر کی ضرورت پہلے سے کہیں زیادہ ہے کہ نیٹو اور یورپی یونین آپس میں زیادہ قریبی اور فوری فوجی تعاون کا مظاہرہ کریں۔

مغربی ملکوں کے مطابق روس نے یوکرائن کو دباؤ میں لانے اور انتقام کا نشانہ بنانے کی مہم شروع کر رکھی ہے، جس کا راستہ روکا جانا چاہیے۔ راسموسن کے بقول نیٹو ماسکو کی اسی مہم کو ناکام بنانے کی جدوجہد میں ہے اور روس کے قریب واقع نیٹو کی رکن ریاستوں کو ان کی سلامتی کی عملی یقین دہانی کے لیے نیٹو نے ایک سہ جہتی منصوبہ بنا لیا ہے۔

اس سوال کے جواب میں کہ آیا مغربی دفاعی اتحاد اپنی رکن مشرقی یورپی ریاستوں میں فوجی اڈے بھی قائم کر سکتا ہے، راسموسن نے کہا کہ اتحادی ملکوں کے مؤثر دفاع کو یقینی بنانے کے لیے نیٹو کے پختہ ارادوں پر کسی کو کوئی شک نہیں ہونا چاہیے۔

اسی دوران اقوام متحدہ کے انسانی حقوق کے دفتر کے سینئر اہلکار ایوان سیمونووچ نے آج کہا کہ کییف میں یوکرائن کی عبوری حکومت کو موجودہ کشیدگی میں کمی کے لیے تمام اقلیتوں کو سیاسی عمل میں شامل کرنا چاہیے تاکہ داخلی منافرت پر مبنی سوچ کا تدارک کیا جا سکے۔

دوسری طرف یورپی یونین کی طرف سے پابندیوں میں اضافے کے کل پیر کو کیے گئے فیصلے پر عمل درآمد کے بارے میں روس کی طرف سے آج کہا گیا کہ ایسی کوئی پابندیاں کارگر نہیں ہوں گی اور ان کے غیر پیداواری نتائج برآمد ہوں گے۔