’مالی اپنے ثقافی ورثے کی حفاظت کرے گا‘

 یونیسکو کے ہیڈکوارٹرز میں ’مالی سے اظہار یکجہتی کے دن‘ میں شرکت کے لیے پیر کو پہنچنے والے مالی کے وزیرثقافت برونو مائیگا نے کہا، ’یہ جہادی ہاتھوں سے تحریر کردہ مکالوں کو جلانے اور دہشت پھیلا کر موسیقی سننے پر پابندی سمیت مقامی ثقافتی رسومات کے خاتمے کی کوشش تھی۔ وہ ہماری روح مسمار کر دینا چاہتے تھے اور ہمارے ثقافتی اثاثوں کو برباد کر دینا چاہتے تھے۔‘

مائیگا نے کہا دہشت گردوں کا مقصد تھا کہ وہ مالی کا ماضی، اس کی ثقافت، اسکی شناخت اور حتیٰ کہ اس کا وقار سب کچھ مٹا دیں۔

یونیسکو کی اس کانفرنس میں دنیا بھر کے ثقافتی ماہرین، حکومتی وفود، فنکار اور دانشور شریک تھے۔ ان کا مقصد اسلامی شدت پسندوں کے ہاتھوں شمالی مالی میں قدیم انسانی تاریخی مقامات کو پہنچنے والے نقصانات سے متعلق گفتگو کرنا اور انہیں دوبارہ زندگی دینے کے لیے اقدامات کا جائزہ لینا تھا۔

واضح رہے کہ گزشتہ برس ایک فوجی بغاوت کے بعد شمالی مالی میں طوارق باغیوں اور اسلامی شدت پسندوں نے پیش قدمی کرتے ہوئے ایک بڑا حصہ اپنے قبضے میں کر لیا تھا۔ بعد میں اسلامی شدت پسندوں نے طوارق باغیوں کو بھی شمالی مالی سے نکال باہر کیا تھا اور وہاں ’اسلامی شریعت‘ کا نفاذ کر دیا تھا۔

اسلامی شدت پسندوں کے ہاتھوں وہاں موجود متعدد ایسے مقامات تباہ ہوئے، جنہیں اقوام متحدہ کے ادارہ برائے ثقافت یونیسکو نے انسانی ورثہ قرار دے رکھا تھا۔

اسلامی شدت پسندوں کی جانب سے پیش قدمی کو روکنے کے لیے فرانس نے فوجی مداخلت کر کے مقبوضہ علاقوں کو ان عسکریت پسندوں سے آزاد کروایا۔ اس آپریشن میں افریقی ممالک کے فوجیوں نے بھی حصہ لیا۔

at/ia (AFP)