فلم فیسٹیول میں بوسہ، ایرانی اداکارہ کی معذرت

ایران کی سرکاری نیوز ایجنسی ارنا کے مطابق حاتمی نے جمعے کے روز ایک بیان میں معافی مانگی ہے۔ حاتمی نے کان فلم فیسٹیول کی ایک تقریب میں اس فلمی میلے کے سربراہ کو گال پر بوسہ دیا تھا۔ جس پر ایرانی حکام نے سخت ردعمل کا اظہار کیا تھا۔

اپنے بیان میں لیلیٰ حاتمی کا کہنا تھا، ’’مجھے سخت افسوس ہے کہ میں کئی افراد کے احساسات کو ٹھیس پہنچانے کا باعث بنی۔‘‘

ایرانی سنیما آرگنائزیشن کے نام اپنے خط میں حاتمی نے کہا کہ وہ عوامی سطح پر برتاؤ کے حوالے سے اسلامی احکامات کا احترام کرتی ہیں، مگر فیسٹیول کے صدر 83 سالہ گیلز جیکوب کے موقع پر ان سے بھول ہوئی۔ ان کا کہنا تھا کہ اس کی وجہ جیکوب کو معمر ہونا تھا۔

اپنے بوسے کی وضاحت کرتے ہوئے ان کا کہنا تھا، ’’میرا ہاتھ ملانے کا غیر سوچا سمجھا عمل بے ثمر تھا۔‘‘

انہوں نے مزید کہا، ’’گو کہ مجھے یہ وضاحت پیش کرتے ہوئے سخت شرمندگی ہو رہی ہے، تاہم میرے پاس یہ تفصیلات بتانے کے علاوہ اور کوئی راستہ بھی نہیں، تاکہ لوگ یہ سمجھ سکیں کہ میں کس صورت حال میں گرفتار ہو گئی تھی۔‘‘

ارنا کے مطابق انہوں نے مزید لکھا، ’’میری نگاہوں میں یقینی طور پر وہ عمر رسیدہ اور میرے دادا جیسے تھے اور وہ میرے میزبان بھی تھے۔‘‘

واضح رہے کہ ایرانی میڈیا پر ایک فوٹو سامنے آیا تھا، جس میں حاتمی رواں ماہ کے آغاز پر کان فلم فیسٹیول کی افتتاحی تقریب میں جیکوب کو بوسہ دیتی دکھائی دیتی ہیں۔

اس بارے میں اتوار کے روز ایرانی نائب وزیر برائے ثقافت حسین نوشابادی نے کہا تھا، ’’وہ لوگ جو بین الاقوامی تقریبات میں شرکت کرتے ہیں، انہیں چاہیے کہ وہ ایرانیوں کے احترام اور تکریم کا خیال رکھیں، تاکہ دنیا بھر میں ایرانی عورت کا غلط تاثر پیدا نہ ہو۔‘‘

ان کا کہنا تھا کہ ایرانی عورت عزت اور معصومیت کی علامت ہے اور حاتمی نے اس میلے میں غلط انداز میں شرکت کی اور ان کا عمل مذہبی اقدار کی ترجمانی نہیں کرتا۔