غزہ ميں فائر بندی کے لیے عالمی برداری کا اصرار

اتوار کی شب امریکی صدر باراک اوباما نے اسرائیلی وزیر اعظم بینجمن نیتن یاہو سے ٹیلی فون پر گفتگو کرتے ہوئے اسرائیليوں اور فلسطینیوں کی ہلاکتوں پر اپنی تشویش کا اظہار کیا اور زور دیا کہ غزہ میں فوری طور پر فائر بندی کا معاہدہ طے ہو جانا چاہیے۔ ایک ہفتے کے دوران اسرائیلی وزير اعظم کو کی جانے والی اپنی اس تیسری ٹیلی فون کال میں اوباما نے واضح کیا کہ واشنگٹن حکومت اسرائیل کی طرف سے اپنے دفاع کی کوششوں کی حمایت کرتی ہے۔

سکیورٹی کونسل کا خصوصی اجلاس

ادھر اقوام متحدہ کی سلامتی کونسل نے غزہ میں فائر بندی کی کوششوں کے لیے خصوصی مذاکرات کے بعد زور دیا کہ اطراف اس تنازعے کے خاتمے کے لیے فوری فائر بندی پر متفق ہو جائیں۔ سلامتی کونسل نے اپنے مشترکہ اعلامیے میں اس تنازعے کے نتیجے میں بڑھتی ہوئی ہلاکتوں پر شدید تحفظات و تشويش کا اظہار بھی کیا ہے۔

اس کے باوجود پیر کی صبح بھی اسرائیلی فوج نے غزہ میں اپنی کارروائیوں کا سلسلہ جاری رکھا جبکہ حماس کی طرف سے بھی اسرائيل کی جانب مسلسل راکٹ حملے جاری ہیں۔ غزہ میں گزشتہ پانچ برسوں کے بعد اتوار کا دن سب سے خونریز ترین رہا۔ غزہ کے طبی ذرائع کے مطابق اس دن 120 افراد مارے گئے، جن میں زیادہ تر تعداد بچوں اور خواتین کی بتائی جا رہی ہے۔ بتایا گیا ہے کہ اسرائیلی کارروائی کے نتیجے میں مجموعی طور پر 476 فلسطینی ہلاک ہو چکے ہیں۔

اتوار کے دن ہی اسرائیلی فوج نے تصدیق کی کہ غزہ میں زمینی آپریشن کے تیسرے دن اس کے مزید تیرہ فوجی مارے گئے۔ یوں اس تنازعے کے دوران اسرائیلی فوجیوں کی ہلاکتوں کی تعداد اٹھارہ ہو گئی ہے۔

ایک تازہ پیشرفت میں حماس کے جنگجو دھڑے نے دعویٰ کیا ہے کہ اس نے ایک اسرائیلی فوجی کو اغوا کر لیا ہے۔ تاہم اقوام متحدہ میں اسرائیلی سفارتکار نے ایسی خبروں کو مسترد کرتے ہوئے انہیں صرف ایک بے بنیاد افواہ قرار دیا ہے۔

جان کیری کا دورہ مصر

حماس کی طرف سے راکٹ حملوں کے جواب میں آٹھ جون کو اسرائیلی دفاعی افواج نے جنگجوؤں کے خلاف اپنی فضائی کارروائی شروع کی تھی جبکہ جمعرات سے بری فوج بھی غزہ میں داخل ہو گئی تھی۔ اگرچہ عالمی برداری غزہ میں فائر بندی کا تقاضا کر رہی ہے تاہم اسرائیلی وزیر اعظم کہہ چکے ہیں کہ وہ غزہ میں اپنی زمینی کارروائی میں توسیع کر رہے ہیں۔

اس صورتحال میں اقوام متحدہ کے سیکرٹری جنرل بان کی مون کے مشرق وسطیٰ پہنچنے کے بعد امریکی وزیر خارجہ جان کیری بھی قاہرہ کا دورہ کر رہے ہیں۔ جان کیری اپنے اس دورے کے دوران مصری اور دیگر علاقائی رہنماؤں کے ساتھ اپنی ملاقاتوں میں اسرائیل اور حماس کے مابین فائر بندی کی کوششیں کریں گے۔

برطانوی وزیر اعظم ڈیوڈ کیمرون نے بھی ٹیلی فون پر نیتن یاہو سے اپنی گفتگو میں اسرائیل کے ساتھ یک جہتی کا اظہار کرتے ہوئے البتہ فلسطینی شہریوں کی ہلاکتوں پر تحفظات کا اظہار کیا ہے۔ انہوں نے اسرائیلی وزیر اعظم پر زور دیا کہ ’تشدد کے اس چکر‘ سے نکلنے کے لیے مصر کی طرف سے پیش کردہ فائر بندی کا مجوزہ منصوبہ اہم ثابت ہو سکتا ہے۔

دوحہ میں مذاکرات

اقوام متحدہ کے سربراہ بان کی مون اپنے مشرقی وسطیٰ کے دورے کے دوران دوحہ پہنچ چکے ہیں، جہاں حماس کے رہنما خالد مشعل اور فلسطینی صدر محمود عباس فائر بندی کے لیے آج بروز پیر ملاقات کرنے والے ہیں۔ یہ ملاقات اگرچہ بروز اتوار ہونا تھی تاہم اسے ایک دن کے لیے مؤخر کر دیا گیا تھا۔ بتایا گیا ہے کہ اس دوران بان کی مون بھی اطراف کے مابین اختلافات کو دور کرتے ہوئے فائر بندی کے معاہدے کو حتمی شکل دینے کی کوشش کریں گے۔

بان کی مون نے اسرائیل پر زور دیا ہے کہ وہ تحمل کا مظاہرہ کرے۔ دوحہ میں ایک پریس کانفرنس کے دوران انہوں نے کہا، ’’بہت زیادہ معصوم لوگ مارے جا رہے ہیں، لوگ خوف کی فضا میں سانس لے رہے ہیں۔‘‘ انہوں نے مزید کہا کہ اس تنازعے کے حل کے لیے اطراف کو مذاکرات کا راستہ اختیار کرنا ہو گا۔