عرب ليگ کا اسرائيل کو ’يہودی رياست‘ تسليم کرنے سے انکار

فلسطين اور اسرائيل کے تنازعے کے حوالے سے سات صفحات پر مبنی اِس قرارداد ميں لکھا ہے کہ ’اسرائيل اور چند بين الاقوامی فريقين کے اسرائيل کو يہودی رياست تسليم کرنے سے متعلق اِس مطالبے کو مسترد کيا جاتا ہے، جِس کا مقصد فلسطينی پناہ گزينوں کی واپسی اور اُنہيں زِر تلافی کی ادائيگی کے حقوق کو ختم کرنا ہے۔‘

اِس قرارداد ميں اسرائيل و فلسطين کے تنازعے سے نمٹنے کے ليے بين الاقوامی کانفرنس کے انعقاد کا مطالبہ کيا گيا ہے اور عالمی مبصرين پر مبنی ’کوارٹٹ‘ کے کردار کا بھی دوبارہ جائزہ ليے جانے کا کہا گيا ہے، جو قرارداد کے مطابق تاحال مکمل طور پر امن قائم کرنے ميں ناکام رہے ہيں۔

مصری دارالحکومت قاہرہ ميں منعقدہ عرب ليگ کے اجلاس ميں اپنی تقرير کے دوران ليگ کے سربراہ نبيل العربی نے عرب رياستوں پر زور ديا کہ وہ يہودی رياست کو تسليم کيے جانے کے اسرائيلی مطالبے کے خلاف پختہ قدم رہيں۔ العربی نے کہا کہ اسرائيلی مطالبہ امن مذاکرات کے ليے طے شدہ فريم ورک سے ہٹنے کے مساوی ہے۔ انہوں نے اسرائيل پر الزام عائد کيا کہ وہ اِس کے ذريعے امن مذاکرات کو پٹری سے اتارنے کی کوشش کر رہا ہے۔

گزشتہ روز منعقدہ اِس اجلاس ميں يہ فيصلہ بھی کيا گيا کہ مارچ کے آخری ہفتے ميں کويت ميں ہونے والے عرب رہنماؤں کے سربراہی اجلاس ميں اِس معاملے کو دوبارہ اٹھايا جائے گا۔

بعد ازاں اجلاس کے اختتام پر فلسطينی وزير خارجہ رياض مالکی نے رپورٹروں سے بات چيت کرتے ہوئے کہا کہ اِس قرارداد سے صدر محمود عباس کی پوزيشن مستحکم ہوئی ہے اور اُن کے موقف کو تقويت ملی ہے۔ فلسطينی صدر عباس عنقريب امريکا کا دورہ کرنے والے ہيں اور ستّرہ مارچ کو اُن کی امريکی صدر باراک اوباما کے ساتھ ملاقات طے ہے۔ امکان ہے کہ اُن پر اس دورے ميں کافی دباؤ ہوگا۔ مالکی نے مزيد کہا، ’’عرب ليگ کے وزرائے خارجہ نے يہ قرارداد اِس ليے منظور کی تاکہ محمود عباس واشنگٹن جا کر اُن يعنی وزرائے خارجہ کے حوالے سے بات کر سکيں۔‘‘

يہاں يہ بات بھی قابل ذکر ہے کہ فلسطينی صدر يہ کہہ چکے ہيں کہ ’فلسطينی لبريشن آرگنائزيشن‘ 1993ء ميں اسرائيل کو رياست کے طور پر تسليم کر چکی ہے اور يہ کافی ہے۔

فلسطين اوراسرائيل کے درميان امن مذاکرات کا آغاز کئی سال کی تعطلی کے بعد گزشتہ برس ہی ہوا ہے، جس ميں واشنگٹن کی ثالثی کا کردار کليدی رہا۔ تاہم يہ مذاکراتی عمل تنازعات کا شکار ہے کيونکہ فلسطين 1967ء سے اسرائيل کے زير قبضہ حصوں مغربی کنارے، غزہ پٹی اور مشرقی يروشلم ميں رياست کے قيام کا خواہاں ہے ۔ نيوز ايجنسی ايسوسی ايٹڈ پريس کے مطابق اگرچہ امريکا اِس فلسطينی مطالبے کی تائيد کرتا ہے لیکن اسرائيلی وزير اعظم بينجمن نيتن ياہو اِسے تسليم کرنے کے ليے تيار نہيں۔ نيتن ياہو ابھی پچھلے ہی دنوں اپنے دورہ امريکا کے موقع پر اوباما سے مل چکے ہيں۔