روہنگیا مسلمانوں کی ’نسل کُشی‘ کے پانچ برس

 میانمار میں فوجی آپریشن کے بعد ملک سے فرار ہونے اور مہاجرت اختیار کرنے پر مجبور روہنگیا باشندوں نے جمعرات 20 اگست کو بنگلہ دیش میں 'نسل کشی‘ کے واقعات کے پانچ سال مکمل ہونے پر ریلیاں نکالیں۔

اگست 2017 ء میں تقریباً 750,000 روہنگیا مسلمانوں نے حملوں سے بچنے کے لیے بنیادی طور پر بدھ مت کے پیروکاروں کے ملک میانمار کی سرحدیں پار کرنا شروع کیں۔ ان میں سے اکثریت نے پڑوسی ملک بنگلہ دیش میں پناہ لی اس دوران روہنگیا باشندوں کا 'قتل عام‘ ہوا۔ ان واقعات کو  اقوام متحدہ کی اعلیٰ ترین عدالت میں نسل کشی کے ایک تاریخی مقدمے کے طور پر درج کر لیا گیا ہے۔

آج تقریباً دس لاکھ روہنگیا، جن میں سے نصف کی عمر 18 سال سے کم ہے، ان کیمپوں میں یا جھونپڑیوں میں کسمپرسی کی زندگی بسر کر رہے ہیں، جہاں مون سون کی بارشوں کے دوران سیوریج کا پانی اُبل پڑتا ہے اور ندی کی مانند گندگی بہنے لگتی ہے۔

یورپی یونین روہنگیا کی وطن واپسی کے لیے کیا کر سکتی ہے؟

کیمپوں میں ریلیوں کا انعقاد

جمعرات 25 اگست کو بنگلہ دیش کے مہاجر کیمپوں میں زندگی گزارنے والے ہزاروں روہنگیا مسلمانوں نے ریلیاں نکالیں۔ اس موقع پر اپنے احتجاج کا بھرپور اظہار کرتے ہوئے ان روہنگیا مسلمانوں نے ہاتھوں میں بینرز اُٹھا رکھے تھے، جن پر ایسے نعرے درج تھے، جن میں روہنگیا مسلمان اپنی آبائی ریاست میں اپنی واپسی کا مطالبہ کر رہے تھے۔ روہنگیا مسلمانوں کے ایک نوجوان رہنما مونگ ساوید االلہ  اس موقع پر آبدیدہ نظر آ رہے تھے۔

انہوں نے ایک بیان دیتے ہوئے کہا،'' آج وہ دن ہے، جس میں ہزاروں روہنگیا مارے گئے تھے۔‘‘ ساوید اللہ اس وقت دنیا کی سب سے بڑی پناہ گزینوں کی بستی کوتوپالونگ میں منعقد ہونے والی ریلی کی قیادت کر رہے تھے۔ ان کا مزید کہنا تھا،'' 25 اگست سے وابستہ درد کو صرف روہنگیا ہی سمجھ سکتے ہیں۔ آج سے پانچ سال پہلے اس دن تقریباً دس لاکھ روہنگیا بے گھر ہوئے تھے۔ 2017 ء میں اس دن ہمارے 300 سے زائد گاؤں جلا کر راکھ کر دیے گئے تھے۔‘‘

 روہنگیا برادری کے ایک اور رہنما سید اللہ نے کہا،'' ہم بس اپنے وطن کی طرف باعزت اور باوقار طریقے سے واپسی چاہتے ہیں۔‘‘ سید اللہ کا مزید کہنا تھا،''بدقسمتی سے، ہماری فریاد پر کسی کے کانوں میں جوں تک نہیں رینگتی۔ بین الاقوامی برادری کچھ نہیں کر رہی۔ یہاں ہم کیمپوں میں ترپال اور بانس کی پناہ گاہوں میں پڑے ہوئے ہیں اور چندے پر بمشکل زندہ ہیں۔‘‘

ریلیوں میں شریک بہت سے روہنگیا مسلمانوں نے 1982ء کے ایک قانون کو منسوخ کرنے کا مطالبہ بھی کیا، جس کے تحت میانمار میں ان کی شہریت چھین لی گئی تھی اور تب سے انہیں بڑے پیمانے پر غیر ملکی کے طور پر دیکھا جانے لگا۔

بنگلہ دیش: ایک لاکھ روہنگیا پناہ گزینوں کو متنازع جزیرے پر منتقل کرنے کا فیصلہ

وطن واپسی کی متعدد کوششیں ناکام

روہنگیا مسلمانوں کی مہاجر یا پناہ گزین کیمپوں سے وطن واپسی کی متعدد کوششیں ناکام ہو چُکی ہیں۔ ان باشندوں نے تحفظ اور اپنے حقوق کی ضمانتوں کے بغیر وطن واپسی سے انکار بھی کر رکھا ہے۔ اس کمیٹی کے رہنماؤں کو شکایت ہے کہ  ان کی برادری کو خاردار تاروں سے گھرے کیمپوں میں رکھا گیا ہے، جہاں سکیورٹی کی صورتحال بھی ابتر ہوتی جا رہی ہے۔ 2017 ء سے اس علاقے میں رونما ہونے والے تشدد کے متعدد واقعات میں اب تک کم از کم 100 افراد مارے جا چکے ہیں۔

 بہت سی ہلاکتوں کا الزام روہنگیا باغی گروپ کے ساتھ ساتھ منشیات کی اسمگلنگ اور انسانی اسمگلنگ میں ملوث گروہوں پر بھی لگایا جاتا ہے، جو کیمپوں میں موجود نوجوانوں کی آسانی سے بھرتی کرتے رہتے ہیں۔ بنگلہ دیشی پولیس کی طرف سے انتقامی کارروائی کے خوف سے اپنا نام بتانے سے انکار کرتے ہوئے ایک نوجوان روہنگیا کارکن نے کہا،''یہ روہنگیا کے لیے ایک جیل ہے۔ ان پانچ سالوں میں روہنگیا کی زندگی بدتر ہو گئی ہے۔‘‘

 اُس کا مزید کہنا تھا،''روہنگیا کی دکانوں کو مسمار کر دیا گیا تھا۔ ہمیں اپنے رشتہ داروں سے ملنے کے لیے کیمپوں سے باہر جانے کی اجازت لینا پڑتی تھی۔ تشدد اور ٹارگٹ کلنگ کی بڑھتی ہوئے واقعات کی وجہ سے ہم خود کو غیرمحفوظ محسوس کر رہے ہیں۔‘‘

روہنگیا قتلِ عام: امریکا نے "نسل کشی" قرار دینے سے کیوں گریز کیا؟

جمعرات کو ڈاکٹرز ود آؤٹ بارڈرز (ایم ایس ایف) کی طرف سے شائع ہونے والے پناہ گزینوں کے ایک سروے سے پتہ چلتا ہے کہ روہنگیا کیمپوں کی صورتحال تیزی سے غیر صحت بخش ہوتی جا رہی ہے۔

ک م/ اا(اے ایف پی)