روسی فوجی تعیناتی اپنی سرزمین کی سلامتی اور دفاع کے لیے ہے، کریملن

گزشتہ جمعرات کو جینیوا میں یورپی یونین، روس، امریکا اور یوکرائن کے مابین طے پانے والا معاہدہ مشرق و مغرب کے مابین بڑھتی ہوئی کشیدگی کو روکنے کے ضمن میں امید کی ایک کرن ثابت ہوئی ہے۔ یوکرائن کے تنازعے کے سبب مغربی بلاک اور روس کے درمیان سرد جنگ کے بعد سے اب تک کے سب سے گہرے اختلافات سامنے آئے جسے عالمی سلامتی اور امن کے تناظر میں تشویش ناک قرار دیا جا رہا تھا۔

آج ہفتے کے روز روسی وزارت خارجہ نے وعدہ کیا ہے کہ روس یوکرائن کو بحران سے نکالنے کے لیے اُس کی ہرممکن مدد کرے گا تاہم وزارت کے مطابق حالات میں کشیدگی کم کرنے کی حتمی ذمہ داری یوکرائنی حکام کی ہے نہ کہ بیرونی طاقتوں کی۔

روسی وزارت خارجہ کی طرف سے یہ بیانات جنیوا میں دو روز قبل ہونے والے چہار فریقی مذاکرات کے بعد سامنے آئے ہیں۔ اُدھر کریملن کے ایک ترجمان نے اپنے ایک بیان میں کہا ہے کہ یوکرائن کی سرحدوں کے نزدیک اضافی روسی فورسز کی تعیناتی دراصل یوکرائن میں عدم استحکام اور بدامنی کے رد عمل کے طور پر عمل میں لائی گئی تھی۔ روس کی طرف سے یہ بیان روس کے ماضی کے اُس بیان کی تردید ہے جس میں کہا گیا تھا کہ روسی فوجی سرحدی علاقے میں اپنی روٹین کی مشقوں کے لیے تعینات کیے گئے ہیں۔

روسی صدر کے ترجمان دیمتری پشکوف نے روسیا ون ٹیلی وژن چینل پر اپنے بیان میں کہا، ’’یوکرائن کی سرحد کے نزدیک ہم نے اپنے فوجی تعینات کیے ہیں۔ ان میں سے کچھ فوجی مستقل طور پر وہیں تعینات ہیں جبکہ دیگر فوجیوں کی تعیناتی یوکرائن کی صورتحال کے پس منظر میں عمل میں لائی گئی تھی۔‘‘ پشکوف نے مزید کہا، ’’میں معذرت کے ساتھ یہ کہنا چاہتا ہوں کہ یوکرائن ابھی حال ہی میں ایک فوجی بغاوت سے گزرا ہے، ایسے میں اس کا پڑوسی کوئی بھی ملک ہو، وہ اپنی سرحدوں کی حفاظت کے لیے خاص قسم کے اقدامات کرے گا۔‘‘

صدر پوٹن کے ترجمان کا کہنا ہے کہ ایک خود مختار ریاست کی حیثیت سے روس بغیر کسی پابندی یا روک ٹوک کے اپنی سرزمین کے کسی بھی حصے میں اپنی فوج تعینات کرنے کا حق رکھتا ہے۔ پشکوف نے ان الزامات کو رد کیا جن کے تحت روسی فوج نے یوکرائن کی سر زمین پر رونما ہونے والے واقعات کے دوران کسی قسم کی مداخلت کی ہے۔ انہوں نے کہا کہ اس قسم کے دعوے غلط اور بے بنیاد ہیں۔

اُدھر اتار تاس نیوز ایجنسی کے مطابق روسی صدر ولادیمیر پوٹن نے سرکاری ٹیلی وژن کو ایک انٹر ویو دیتے ہوئے اس امید کا اظہار کیا کہ مغربی دنیا کے ساتھ روس کے تعلقات جلد بحال ہو جائیں گے۔ مزید یہ کہ وہ تعلقات کی بہتری کی راہ میں کوئی رکاوٹ نہیں دیکھ رہے ہیں۔ پوٹن سے کیے گئے اس سوال کے جواب میں کہ کیا روس اور مغربی ممالک کے تعلقات رواں سال کے اواخر تک بہتر ہونے کی امید کی جا سکتی ہے؟ پوٹن کا کہنا تھا، ’’اس کا انحصار صرف اور صرف ہم پر نہیں بلکہ ہمارے ساتھیوں پر ہے۔‘‘ پوٹن نے مزید کہا کہ انہیں مغربی دنیا اور روس کے تعلقات میں بہتری کی راہ میں کوئی رکاوٹ نظر نہیں آتی۔‘‘ تاہم جمعہ 18 اپریل کو یوکرائن کے روس نواز گروپوں نے یوکرائن کے تنازعے کو حل کرنے کے لیے طے پانے والے جنیوا معاہدے کو مسترد کر تے ہوئے کہا تھا کہ جب تک کییف کی عبوری حکومت مستعفی نہیں ہوتی وہ پیچھے نہیں ہٹیں گے۔ جنیوا معاہدے میں روس نواز مسلح گروپوں سے سرکاری عمارات اور مقامات سے فوری طور پر قبضہ ختم کرنے کو کہا گیا تھا۔ اس کے باجود مظاہرین کی جانب سے سرکاری املاک کا کنٹرول حاصل کرنے کے واقعات منظر عام پر آئے تھے۔

دریں اثناء یوکرائن کی سابق وزیر اعظم اور صدارتی امیدوار یولیا ٹیمو شینکو نے آج ہفتہ 19 اپریل کو یوکرائن کی تمام سیاسی پارٹیوں سے اُس گول میز کانفرنس میں شرکت کی اپیل کی جس کا مقصد ملک کو مزید بحران اور اس کا شیرازہ بکھرنے سے بچانے کے لیے مذاکرات کرنا ہے۔ ان مذاکرات کے لیے کسی تاریخ کا فی الحال اعلان نہیں ہوا ہے تاہم اطلاعات کے مطابق یولیا ٹیمو شینکو ڈونیٹسک پہنچ چُکی ہیں۔ یہی وہ شورش زدہ علاقہ ہے جہاں روس نواز باغی یوکرائن سے علیحدگی کا مطالبہ کرتے ہوئے ریلیاں نکال رہے ہیں۔